Afhjúpun

Sagði börnum að þau væru „sexí“ skömmu eftir að hann fékk uppreist æru

Hjalti Sigurjón Hauksson átti í samskiptum við ungar víetnamskar stúlkur á samfélagsmiðlum meðan umsókn hans um uppreist æru var til meðferðar í innanríkisráðuneytinu og eftir að hann var sæmdur óflekkuðu mannorði af íslenska ríkinu.

Hjalti Sigurjón Hauksson, maður sem dæmdur var fyrir að misnota stjúpdóttur sína nær daglega í 12 ár,  tjáði sig við barnunga víetnamska stúlku á Facebook þann 18. desember 2016, nokkrum vikum eftir að íslenska ríkið sæmdi hann óflekkuðu mannorði. Stúlkan er nýbyrjuð í framhaldsskóla í Víetnam, og má því ætla að hún sé 15 eða 16 ára gömul. Hjalti segir í ummælum sínum til stúlkunnar að hún sé kynþokkafull. „Meiriháttar Falleg og Sexí Algjör Demantur.“ 

Sams konar ummæli frá Hjalta er að finna undir myndum af fleiri víetnömskum stúlkum, meðal annars stúlku sem er fædd árið 2004. 

„Meiriháttar Falleg og Sæt Algjör 
Demantur Spes Sexí Kv Hjalti“

„Meiriháttar Falleg og Spes Sexí,“ skrifaði Hjalti til einnar þeirra fimm dögum áður en hann fékk uppreist æru. Þremur dögum eftir að forseti staðfesti stjórnsýsluathöfnina sagði Hjalti tveimur stúlkum að þær væru „fallegar saman“. Í febrúar síðastliðnum skrifaði hann undir mynd af enn annari stúlku: „Meiriháttar Falleg ogSætAlgjör DemanturSpes Sexí KvHjalti.“

Sæmdur óflekkuðu mannorði

Hjalti Sigurjón var dæmdur í fimm og hálfs árs fangelsi árið 2004 fyrir að hafa nauðgað stjúpdóttur sinni nær daglega frá því hún var um 5 ára gömul þar til hún var tæplega 18 ára. Um er að ræða þyngsta dóm sem fallið hafði vegna kynferðisbrota gegn barni á þessum tíma, en Hæstiréttur taldi manninn hafa misnotað freklega vald sitt yfir stúlkunni sem stjúpfaðir, brotið ítrekað og gróflega gegn henni og valdið henni djúpstæðum skaða. 

Ólöf Nordal, þáverandi innanríkisráðherra, lagði til við forseta Íslands í fyrra að Hjalti fengi uppreist æru og óflekkað mannorð, en bréfið var undirritað af Guðna Th. Jóhannessyni forseta þann 16. september og öðlaðist þá formlegt gildi. Um þetta leyti var Hjalti virkur á samfélagsmiðlum, en asískar stúlkur eru í miklum meirihluta á vinalista hans á Facebook.

Eins og fram kom í umfjöllun Stundarinnar sýndi Hjalti aldrei iðrun og neitaði staðfastlega sök fyrir dómi. Gunnar Magnús Diego, maður sem starfaði um tíma á sama vinnustað og Hjalti Sigurjón Hauksson, lýsir kynnum sínum af Hjalta í Facebook-færslu sem vakið hefur mikla athygli. Segir Gunnar að Hjalti hafi fullyrt við sig að hann og stúlkan sem hann misnotaði hefðu átt í ástarsambandi og hann væri raunar bjargvættur hennar. Hjalti hafi ekki séð neitt athugavert við gjörðir sínar og því sæti furðu að hann hafi fengið uppreist æru.

Þegar Stundin hafði samband við Hjalta í síðustu viku kvartaði hann undan því að níðst hefði verið á sér og sagðist hafa verið dæmdur án sannana. Rétt er að taka fram að bæði Héraðsdómur Reykjavíkur og Hæstiréttur Íslands töldu fullsannað að maðurinn hefði brotið gróflega og ítrekað gegn stjúpdóttur sinni. Hjalti kvartaði einnig undan því að sagðar væru fréttir af viðkvæmum málum: „Það eru fréttirnar sem pína fólkið mest. Það er skelfilegt.“

Lög banna að málið sé rifjað upp 

Veiting uppreistar æru hefur verið talsvert til umræðu undanfarnar vikur eftir að greint var frá því að Robert Downey, sem áður hét Róbert Árni Hreiðarsson, hefði verið veitt „óflekkað mannorð“ með staðfestingu forseta Íslands og dómsmálaráðherra.  Robert var dæmdur í þriggja ára fangelsi árið 2008 fyrir að brjóta gegn fjórum stúlkum, einni sem var fjórtán ára þegar brotin voru framin og þremur sem voru fimmtán ára.

Á grundvelli núgildandi meiðyrðalaga geta afbrotamenn sem hlotið hafa uppreist æru farið í ærumeiðingarmál við þá sem rifja upp afbrot þeirra. Þannig segir í 238. gr. almennra hegningarlaga: „Hafi maður, er sætt hefur refsidómi fyrir einhvern verknað, síðar öðlast uppreist æru, er ekki heimilt að bera hann framar þeim sökum, og leysir sönnun því ekki undan refsingu, ef svo stendur á.“

Skráðu þig inn til að lesa

Þú færð 4 greinar fríar í mánuði. Þú hefur síðan val um að styrkja óháða blaðamennsku með áskrift á hagstæðu verði, frá aðeins 1.190 krónum á mánuði. Leiðbeiningar má nálgast á stundin.is/leidbeiningar.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Dæmdur fyrir hrottalega nauðgun gegn þroskahamlaðri konu – fékk uppreist æru í fyrra

Fréttir

Geir Jón skrifaði meðmæli fyrir nauðgara sem hann rannsakaði

Fréttir

Sveinn segir söguna alla: „Okkur fannst þessi tengsl mjög skrítin“

Fréttir

Brynjar kemur fyrir í gögnunum sem áttu að fara leynt

Fréttir

Brynjar settur af sem formaður stjórnskipunar- og eftirlitsnefndar

Fréttir

Júlíus Vífill veitti lögmanni meðmæli

Mest lesið í vikunni

Fréttir

Hjalti fundaði með Bjarna og Brynjari eftir að hann var kærður

Fréttir

Dæmdur fyrir hrottalega nauðgun gegn þroskahamlaðri konu – fékk uppreist æru í fyrra

Fréttir

Geir Jón skrifaði meðmæli fyrir nauðgara sem hann rannsakaði

Pistill

Þessi ótrúlegi óheiðarleiki

Pistill

Karlmaður í kventíma

Fréttir

Faðir forsætisráðherra var meðmælandi Hjalta – ráðuneytið hélt því leyndu