Samstarfsflokkar Sjálfstæðisflokksins í ríkisstjórn myndu þurrkast út af þingi, ef kosið væri nú, miðað við niðurstöður spurningakönnunar MMR um stuðning við stjórnmálaflokka.
Björt framtíð mælist einungis með 2,4 prósent fylgi, en fékk 7,2 prósent í alþingiskosningunum síðasta haust. Þá mælist Viðreisn með einungis 4,7 prósent fylgi, en fékk stuðning 10,5 prósenta í kosningunum.
Í alþingiskosningum koma einungis þeir flokkar til greina við úthlutun jöfnunarþingsæta sem fá yfir 5 prósent fylgi.
Sjálfstæðisflokkurinn mælist hins vegar með sama fylgi og hann fékk í kosningum, eða 29,3 prósent.
Stuðningur við ríkisstjórnina mælist um 34 prósent, en samanlagður stuðningur við ríkisstjórnarflokkana samkvæmt þessu er 36,4 prósent.
Athugasemdir