Sjö vikna gömul stúlka var færð í einangrun á barnaspítala Hringsins í gær vegna kíghósta. Stúlkan hefur verið sett á lyf en það á eftir að koma í ljós hvort þau virki. „Það er ekki alveg vitað strax hvort að lyfin virki en við bíðum og vonum,“ segir móðir stúlkunnar, Helena Stefánsdóttir. Hún segir að aðeins eitt lyf sé til sem virki á bakteríuna og drepi hana en það hafi ekki áhrif á einkennin.
Það tók rúma viku að greina stúlkuna með sjúkdóminn sem getur verið lífshættulegur ungum börnum. „Einkennin komu fyrst á mánudaginn í síðustu viku og daginn eftir fór hún að hósta. Þá fór ég með hana til barnalæknis á Domus Medica en hann fann ekkert að henni. Svo á föstudaginn fékk hún fyrsta hóstakastið þar sem hún blánaði og var alveg að kafna. Ég fór því með hana beint á bráðamóttökuna en aftur vorum við sendar heim með þeim skilaboðum að ekkert alvarlegt amaði að. Hóstinn hélt áfram að versna og í fyrradag fengum við tíma hjá öðrum barnalækni. Hann sendi hana í röntgen og tók sýni til að athuga hvort hún væri með kíghósta. Mig hafði grunað að hún væri með kíghósta og svo reyndist vera,“ segir Helena.
Helena deildi færslu á Facebook í gær þar sem hún greindi frá málinu og birtir hljóðupptökur af sárum hósta dóttur sinnar. Þar gagnrýnir hún foreldra sem að kjósa að bólusetja ekki börn sín og setji þannig önnur börn í lífshættu. Börn eru fyrst bólusett við kíghósta við þriggja mánaða aldur og var dóttir Helenar því í sérstakri hættu. „Vill fólk í alvöru taka sénsinn á að barninu þeirra geti liðið svona illa og að það geti smitað aðra sem mega ekki eða eru of ungir til að fá bólusetningu?“ spyr Helena í færslunni. „Hún liggur enn á spítalnum en hefur ekki tekið neitt svakalegt hóstakast síðan við komum inn í gær.“
Helena brýnir einnig fyrir fullorðnu fólki að endurnýja bólusetningar sínar en það þarf að gera á tíu ára fresti.
Kíghósti er bakteríusýking sem veldur slæmum langvarandi hósta. Hann er sérstaklega hættulegur börnum yngri en sex mánaða þar sem þau hafa þrengri loftvegi en eldri börn og seigt slímið gerir það að verkum að þau eiga erfitt með að ná andanum. Fyrstu einkenni sjúkdómsins eru allt að tveggja vikna langt kvef með vægum hósta. Eftir það hefst kíghóstinn sem einkennist af endurteknum hóstakviðum sem standa þar til lungun eru tæmd af lofti. Við hóstann gengur seigfljótandi slím upp úr lungunum og algengt er að hóstakviðurnar endi með uppköstum. „Þegar litla dóttir mín fær hóstaköst verður hún öll stíf eins og grjót, eldrauð í framan, blánar í kringum varir, hún ælir af áreynslu og andar ekki.“ Þannig lýsir Helena hóstaköstum dóttur sinnar í færslu á Facebook.
Sjúklingar með kíghósta geta fengið 10 til 20 og allt upp í 40 hóstaköst á sólarhring. Þá er það ekki fyrr en eftir sex til átta vikur sem hægt er að sjá örugg merki þess að sjúkdómurinn sé í rénun.
Embætti Landlæknis deildi þessu myndbandi af barni með kíghósta á vefsíðu sinni:
Þar segir að útbreiðsla sjúkdómsins hafi farið vaxandi á síðustu 20 árum. Á árunum í kringum 1930–1940 létust þúsundir manna af völdum sjúkdómsins, en með tilkomu bóluefnis hefur dregið mjög úr dánartíðni af völdum hans. Þrátt fyrir góða þáttöku í bólusetningum hafa komið upp faraldrar í mörgum löndum hjá fullorðnum og eldri börnum, vegna þess að verndandi áhrif bólusetningarinnar þverra á nokkrum árum.
Ungum börnum er sérlega hætt við alvarlegum afleiðingum sýkingarinnar sem geta verið öndunarstopp, krampar, lungnabólga, truflun á heilastarfsemi og dauði.
Athugasemdir