Óverulegar breytingar eru á fylgi stjórnmálaflokka milli kannanna MMR og flestar eru breytingarnar innan vikmarka. Sjálfstæðisflokkurinn mælist með mest fylgi flokka á landinu en dalar þó lítillega milli kannana. Vinstri græn standa því sem næst í stað en Framsóknarflokkurinn bætir lítillega við sig.
Sjálfstæðisflokkurinn mælist með 25,6 prósenta fylgi, 3,1 prósentustigi lægra en í síðustu könnun MMR sem birt var 28. apríl síðastliðinn. Breytingin á fylgi flokksins dansar á línunni með að vera marktæk en efri vikmörk könnunarinnar með 95 prósenta öryggisbili eru 28,6 prósent.
Stjórnarflokkarnir þrír njóta mests fylgis kjósenda því Vinstri græn mælast með 13,1 prósenta fylgi, 0,2 prósentustigum hærra en síðast, og Framsóknarflokkinn styðja 12,6 prósent aðspurðra en síðast mældist flokkurinn með stuðning 10,5 prósent stuðning. Samtals styðja því yfir helmingur aðspurðra, 51,3 prósent, ríkisstjórnarflokkana þrjá. Stuðningur við ríkisstjórnina mælist eilítið meiri, 55,1 prósent og dalar um 1,1 prósentustig frá fyrri könnun.
Píratar mælast með mest fylgi stjórnarandstöðuflokkanna, 11,3 prósent, og bæta við sig 1,7 prósentustigum frá síðuatu mælingu. Samfylkingin dalar örlítið, mælist nú með stuðning 10,9 prósenta aðspurðra sem er 0,4 prósentustigum lægra en síðast. Viðreisn bætir við sig fylgi usem nemur 1,8 prósentustigi og mælist nú með 10,6 prósenta stuðning.
Sósíalistaflokkurinn og Miðflokkurinn mælast með nákvæmlega sama fylgi, 5,7 prósenta stuðning, en þau tíðindi urðu í síðustu könnun MMR að Sósíalistar mældust þá með meiri stuðning en Miðflokkur, 6 prósenta stuðning borið saman við 5,8 prósenta stuðning við Miðflokkinn. Flokkur fólksins dalar, mælist með 3,3 prósenta stuðning en mældist síðast með 4,8 prósenta stuðning. Er sú fyligsbreyting marktæk. Yrðu þetta niðurstöður kosninga myndi flokkurinn falla út af þingi.
Stuðningur við aðra mældist 1,2 prósent samanlagt. Óákveðnir voru 6,5 prósent, 6,3 prósent kváðust myndu skila auðu, 2,9 prósent hyggjast ekki mæta á kjörstað og 2,4 prósent vildu ekki gefa upp afstöðu. Könnunin var framkvæmd dagana 7.-12. maí og svöruðu 953 henni.
Athugasemdir