Starf forstjóra Hafrannsóknarstofnunar verður auglýst laust til umsóknar en Sigurður Guðjónsson, núverandi forstjóri, mun hafa gegnt starfinu í fimm ár þann 1. apríl næstkomandi. Kristján Þór Júíusson, atvinnuvega- og nýsköpunarráðherra, tilkynnti Sigurði þetta í sérstöku bréfi í september síðlastliðnum samkvæmt því sem Sigurður Guðjónsson segir aðspurður. 

Styr um HafrannsóknarstofnunStyr hefur staðið um Hafrannsóknarstofnun vegna laxeldis og loðnukvóta. Kristján Þór Júlíusson er atvinnuvega- og nýsköpunarráðherra.

Mynd: xd.is

Þetta þýðir að Sigurður fær ekki sjálfkrafa endurráðningu í starfið og verður að teljast líklega að ráðherra hyggist skipa nýjan forstjóra yfir Hafrannsóknarstofnun. Ef til hefði staðið að endurráða Sigurð hefði bréfið ekki verið sent til hans í september en ráðherrar eiga, lögum samkvæmt, að senda slíkar tilkynningar til forstjóra ríkisstofnana ef til stendur að auglýsa störf þeirra. Tilkynning ráðherrans verður að hafa borist sex mánuðum fyrir lok skipunartíma forstjórans. 

Styr um laxeldi og loðnukvóta

Nokkur styr hefur staðið um Hafrannsóknarstofnun á liðnum árum í forstjóratíð Sigurður. Meðal annars vegna laxeldis í sjókvíum og eins vegna útgáfu loðnukvóta en Hafrannsóknarstofnun hefur mælst gegn því að gefinn verði út loðnukvóti vegna bágs ástands hans síðastliðnar þrjárvertíðir. Ekki eru allir á eitt sáttir um afstöðu Hafrannsóknarstofnunar í loðnumálinu. 

Í laxeldinu hefur Hafrannsóknarstofnun verið gagnrýnd fyrir að hafa upphaflega lagst gegn laxeldi í Ísafjarðardjúpi í áhættumati árið 2017. Áhættumatinu var svo breytt og er nú heimild til að stunda laxeldi í Ísafjarðardjúpi, allt að 12 þúsund tonn.

 „Ég get staðfest það að ráðherra hafi tilkynnt mér að hann hyggist auglýsa stöðuna og ég mun sækja um stöðuna“

 Sigurður hefur því ekki setið á friðarstóli hjá Hafrannsóknarstofnun síðastliðin fimm ár. 

Sigurður ætlar að sækja um aftur

Sigurður Guðjónsson segir aðspurður að hann hafi tilkynnt starfsmönnum Hafrannsóknarstofnunar um að starf hans verði auglýst laust til umsóknar á starfsmannafundi í október „Ég get staðfest það að ráðherra hafi tilkynnt mér að hann hyggist auglýsa stöðuna og ég mun sækja um stöðuna,“ segir Sigurður í samtali við Stundina. Hann verður því meðal umsækjenda um starfið þegar þar að kemur. 

Sigurður var valinn úr hópi sex umsækjenda um forstjórastarfið árið 2016. Hinir umsækjendurnir voru Guðni Magnús Eiríksson, Soffía B. Guðmundsdóttir, Þorleifur Ágústsson, Þorsteinn Sigurðsson og Þór Heiðar Ásgeirsson.  

Einn af þeim sem nefndur er nú sem mögulegur arftaki Sigurður er Þorsteinn Sigurðsson, fyrrverandi starfsmaður Hafrannsóknarstofnunar sem ráðinn var til atvinnu- og nýsköpunarráðuneytisins, fyrr á árinu. Þorsteinn var sviðsstjóri uppsjávarsviðs hjá Hafró. 

Nýráðinn forstjóri Hafró, hvort sem það verður áfram Sigurður eða ekki, mun svo taka við starfinu eftir 1. apríl næstkomandi en þá er tæpt hálft ár til næstu Alþingiskosninga.