Ísland kemur víða við sögu í máli saksóknara sem sækjast eftir því að fá Julian Assange framseldan til Bandaríkjanna frá Bretlandi. Réttarhöldin standa nú yfir í Lundúnum. Í ákæruskjölum er Ísland ekki nefnt á nafn heldur aðeins kallað „NATO ríki 1“ en mikið af nýjum upplýsingum um tengslin við Ísland komu fram í réttarsalnum. 

Kristinn Hrafnsson, ritstjóri Wikileaks, segir þetta nýjasta útspil bandarískra stjórnvalda gegn Julian Assange vera farsa sem byggi á vitnisburði manns sem sé dæmdur þjófur, lygari, falsari og kynferðisbrotamaður sem þjáist af persónuleikaröskun á jaðri siðblindu. Maðurinn hafi villt á sér heimildir til að komast undan með fé frá samtökunum. 

„Það er með ólíkindum að bandarísk stjórnvöld dragi fram Sigurð Inga Þórðarson en sýnir ef til vill betur en annað á hvaða vegferð þetta ömurlega mál er í höndum Trump stjórnarinnar,“ segir Kristinn í samtali við Stundina. Sigurður er betur þekktur sem „Siggi Hakkari“ í umfjöllun fjölmiðla hér á landi. 

„Þessi svokallaða viðbót sem hent er inn í málið í miðjum klíðum er haldlaust rugl og hefur óskaplega litla ef nokkra einustu tilvísun í þau 18 ákæruatriði sem hefur verið skellt á Julian Assange,“ segir Kristinn. 

„Þarna eru settar fram furðulegar fullyrðingar eins og þær að Julian og Sigurður hafi reynt að afkóða skjal sem stolið hafi verið frá íslenskum banka. Væntanlega er átt við dulkóðað skjal úr gamla Landsbankanum sáluga sem margir reyndu sig að opna. Að fullyrða að þessu skjali hafi verið stolið er hvergi rökstutt. Margt annað er þarna í graut sem erfitt er að fá botn í.“

 Að sögn Kristins braut Siggi hakkari gegn trausti annarra í Wikileaks. „Það liggur fyrir að Sigurður fór langt út fyrir þann ramma sem honum var markaður sem sjálfboðaliði hjá Wikileaks árið 2010. Hann laug að fólki að hann væri í innsta hring samtakanna, væri starfsmannastjóri, sæi um nýráðningar, væri yfirmaður fjölmiðlatengsla svo eitthvað sé nefnt,” segir Kristinn. Sigurður er ekki nefndur á nafn í dómsskjölum en aðeins kallaður „táningurinn“. 

Mótmæli við dómshúsiðFjöldi fólks hefur mótmælt tilraunum til framsals á Julian Assange til Bandaríkjanna, þar sem hann horfir fram á ákærur með viðurlögum allt að 175 ára fangelsisvist, fyrir að dreifa upplýsingum, meðal annars um dráp Bandaríkjahers á almennum borgurum.

Mynd: TOLGA AKMEN / AFP

Stal frá Wikileaks sem sjálfboðaliði

Kristinn segir að þegar Sigurði var falið að vinna með öðrum sjálfboðaliða frá Kanada, í að setja upp netsölu með smávarning merktum Wikileaks, hafi hann séð sér leik á borði. Í sama mánuði og salan hófst (í febrúar 2011) hafi Sigurður sent falsað skeyti í nafni Julian Assange til netverslunar sem sá um söluna. Hafi hann þannig látið leggja allan afraksturinn inn á eigin einkareikning og stolið jafnvirði um 50 þúsund dollara áður en upp komst. 

„Þegar ég hóf að eltast við hann vegna þessara peninga um sumarið 2011 brá Sigurður á það ráð að skjóta sér inn í bandaríska sendiráðið og bjóða fram aðstoð sína í sakarannsókn FBI gegn Wikileaks,“ segir Kristinn. 

Við dómshúsið í LondonStella Moris, t.v., maki Julians Assange, mannréttindalögmaðurinn Jennifer Robinson og Kristinn Hrafnsson, ritstjóri Wikileaks, við komuna í Old Bailey dómshúsið í miðborg London í vikunni. Ekki tókst að fá málinu vísað frá.

Mynd: Tolga Akmen / AFP

„Það er búið að dæma þennan mann fyrir að stela frá okkur og um 20 aðilum öðrum, einstaklingum og fyrirtækjum. Verra er að hann náði að svívirða fjölda táningsdrengja með kynferðisbrotum á sama tímabili. Þennan ófélega einstakling, sem ég á ekki í nokkrum vandræðum með að kalla skíthæl, dregur ákæruvald Trumps núna upp á dekk í málinu gegn Julian Assange,“ segir Kristinn forviða.

„Þetta hefur ekkert með þessar ákærur að gera. Þær snúast allar um birtingu upplýsinga frá Írak, Afganistan og Guantanamo Bay ásamt sendiráðsskjölunum. Það er vitaskuld ekki nefnt í ákærunni nýju að þegar fulltrúar FBI og saksóknaraembættisins flugu með einkaþotu til Íslands í ágúst 2011 greip Ögmundur Jónasson, þáverandi innanríkisráðherra. í taumana og rak þá öfuga úr landi. Enda hefðu þeir komið til landsins á fölskum forsendum og tilefnið var að leggja gildru fyrir Julian Assange. Auðvitað átti Sigurður Þórðarson að leika þar lykilhlutverk, og það er greinilegt að honum er enn ætlað að leika stórt hlutverk í þessum farsa.“