Ég horfði á bæjarstjóra Hafnarfjarðar og Kópavogs í Bítinu á Bylgjunni í vikunni og borgarstjóra Reykjavíkur í sama þætti í morgun. Þess má geta að sá í Kópavogi er með þeim hæst launuðu í heimi með yfir tvær milljónir á mánuði sjá, en tók á sig lækkun í fyrra eftir þrýsting. Þeir voru meðal annars að ræða við þáttastjórnendur um útsvar, tekjusamdrátt bæjarfélaganna og fleira. Ekkert kom fram hjá þeim á þessu stigi um að skera niður kostnað svo sem laun og fleira.
Mín tillaga er að þessir menn og eitthvað niður embættismanna línuna lækki laun sín í um eina milljón krónur á mánuði eða svo og það hið minnsta næstu þrjá mánuði en betra væri út árið. Það er hægt að miða við eins og þreföld dagvinnulaun lægst launaða starfsfólksins í sveitafélögunum, sbr. taxta ósaminna Eflingar starfsmanna.
Það er hægt að miða við eins og þreföld dagvinnulaun lægst launaða starfsfólksins í sveitafélögunum
Ég skora hér með jafnframt á leiðtoga jafnaðarmanna í borginni að vera fyrstur á þennan launa lækkana vagn, Dag B. Eggertsson. Spjót hafa beinst að honum og fleirum innan borgarinnar vegna ýmissa framkvæmda sem hafa farið langt, langt fram úr áætlunum. Það eitt og sér væri ástæða slíkrar launaleiðréttingar, eins og skipstjóri á góðu aflaskipi þyrfti að gera. Ég ætla þó hér að draga úr Degi, eitt til tvo spjóta lög. Mínar heimildir frá borginni eru að hann sé bæði vinnusamur, mæti oft fyrstur til vinnu og fari síðastur. Svo er hann auðvitað einn myndarlegasti borgarstjóri í Evrópu.
Við þurfum að leggjast öll á árarnar í samfélagslegri ábyrgð, samhug, aðstoð og fleira meðal annars til að reyna að halda fjárlagahalla ársins 2020, undir 100 milljörðum, frekar en að ávísa þeirri ávísun til komandi kynslóða. Þetta eru eins og stjórnmálamenn segja mikið þessa dagana, fordæmalausir tímar og mikilvægt er að þeir sem hæstu launin hafa og í æðstu stöðum stígi fram– sbr. breiðu bökin með góðu fordæmi. Því er að sama skapi eðlilegt að alþingismenn og æðstu stjórnendur ríkisfyrirtækja og fleiri, lækki sig í launum um það bil 20-30% og viðmið verði þar einnig um ein milljón króna. Laun bæjarstjóra eru auðvitað ekki inn í þessum 100 milljarða halla, þar sem um ræðir ríkið, en tekjur bæjarfélaga vegna útsvars vegna lægri launa skattgreiðenda, tekjustofnar leikskóla og fleira, munu nú dragast saman þannig að án efa verður hallarekstur á flestum þeirra. Nú er tími samtakamáttarins og breiðu bakana.
Höfundur er rekstrarhagfræðingur og framkvæmdastjóri hjá Netið ráðgjöf.
Athugasemdir