Við undirritaðar skorum á borgarráð að hafna breytingum á opnunartíma leikskóla sem samþykktar hafa verið í skóla- og frístundaráði. Við tökum heils hugar undir nauðsyn þess að létta álagi af leikskólastarfsfólki, en teljum þessar breytingar alls ekki vera bestu leiðina til þess. Reykjavíkurborg er einn stærsti atvinnurekandi landsins og er sem slík í lykilstöðu til að létta álaginu, til dæmis með styttingu vinnuvikunnar.
Allt fram á síðasta ár leiddi Reykjavíkurborg framsæknar breytingar á vinnuvikunni. Árið 2015 hófst tilraunaverkefni um styttingu vinnuvikunnar á tveimur starfsstöðvum borgarinnar, en undir lok verkefnisins í fyrra hafði vinnuvikan verið stytt hjá tæpum þriðjungi starfsfsólks. Rannsóknir á áhrifum tilraunaverkefnisins komu almennt vel út. Styttingin hafði jákvæð áhrif á almenna líðan og líðan í vinnu, álag á heimilum minnkaði, barnafjölskyldur áttu auðveldara með að samræma vinnu og einkalíf, karlar tóku meiri þátt í húsverkum og aukna ábyrgð á heimilum. Afköst héldust þau sömu og yfirvinna jókst ekki.
Niðurstöður bentu eindregið til jákvæðra áhrifa, bæði fyrir starfsfólk og atvinnurekanda. Því hefði legið beint við að halda þróun tilraunaverkefnisins áfram og innleiða styttri vinnuviku á alla starfsstaði Reykjavíkurborgar. Sagan sýnir að mikið af þeirri þjónustu sem þykir eðlileg í dag hófst með tilraunastarfsemi, svo sem frístundaheimilin sem upphaflega voru tilraunaverkefni í Breiðholti og þjónustumiðstöðvarnar sem byrjuðu með tilraunaverkefni í Grafarvogi. Tilraunaverkefni sem reynast vel þróast nefnilega oft yfir í almennt samþykkt og sjálfsögð verkefni.
„Þrátt fyrir jákvæðar niðurstöður tók borgarstjórn ákvörðun um að slá verkefnið af“
En svo var ekki með styttingu vinnuvikunnar. Þrátt fyrir jákvæðar niðurstöður tók borgarstjórn ákvörðun um að slá verkefnið af og beina umræðum um framhald þess inn í kjarasamningsviðræður. Sú ráðstöfun er einkar undarleg þegar um sameiginlega hagsmuni er að ræða. Enn undarlegra verður að teljast að hvorki skuli ganga né reka í samningaviðræðum borgarinnar við starfsfólk sitt um þetta borðleggjandi atriði.
Nýjustu vendingar eru svo þær að borgarstjórn ætlar að draga úr of miklu álagi á börn og leikskólastarfsfólk með því að stytta opnunartíma leikskóla. Í stað þess að byggja á fyrirliggjandi gögnum um árangursríka leið, kýs borgarstjórn að skerða þjónustu við börn, auka álag á foreldra, hætta á að áhrifin verði harkalegust á jaðarsett fólk og einstæða foreldra og að þau muni ýkja ójafna verkaskiptingu á heimilum enn frekar.
Það er einlæg von okkar að borgarráð snúi þessari vanhugsuðu ákvörðun skóla- og frístundaráðs við, og beiti sér jafnframt fyrir því að komið verði til móts við kröfur starfsfólks um sómasamleg laun, bættar starfsaðstæður og styttri vinnuviku.
Stuðningskonur leikskólanna,
Claudia Overesch, Edda Ýr Garðarsdóttir, Elísabet Ýr Atladóttir, Gunnur Vilborg, Halldóra Jónasdóttir, Hanna Björg Vilhjálmsdóttir, Ingibjörg Stefánsdóttir, Kristjana Ásbjörnsdóttir, Margrét Inga Gísladóttir, María Lilja Þrastardóttir Kemp, Ósk Gunnlaugdóttir, Sóley Tómasdóttir, Sunna Símonardóttir og Þóra Kristín Þórsdóttir
Athugasemdir