Auglýsingin hverfur eftir stutta stund...
Loka

Fréttir

Vill ekki uppboð á viðbótarkvóta: „Inngrip“ í kvótakerfið sem myndi trufla mikilvæga vinnu

Hanna Katrín Friðriksson, þingflokksformaður Viðreisnar, er mótfallinn því að viðbótarkvóti verði boðinn út, enda myndi slíkt fela í sér „inngrip“ í kvótakerfið. Viðreisn talaði eindregið fyrir uppboði aflaheimilda og „kerfisbreytingum“ í aðdraganda kosninga.

Hanna Katrín Friðriksson, þingflokksformaður Viðreisnar, vill ekki að setja viðbótarkvóta á uppboð ef gerð verður tillaga um viðbótarkvóta fyrir næsta fiskveiðiár sem hefst í september. Þetta kom fram í umræðum undir liðnum störf þingsins á Alþingi í dag. 

Telur Hanna Katrín að slíkt „inngrip“ í aflahlutdeildarkerfið geti haft neikvæð áhrif á vinnu þverpólitískrar nefndar um stjórn fiskveiða. Uppboð aflaheimilda var eitt af helstu kosningaloforðum Viðreisnar í aðdraganda síðustu kosninga.

Þyrfti að hefjast handa strax

Oddný Harðardóttir, þingflokksformaður Samfylkingarinnar, benti á það í umræðunum að með því að bjóða út viðbótarkvóta og verja tekjunum til uppbyggingar heilbrigðiskerfisins gæti Viðreisn slegið tvær flugur í einu höggi og efnt kosningaloforð flokksins um uppboð aflaheimilda og eflingu heilbrigðiskerfisins að hluta.

„Ef tillaga verður gerð um viðbótarkvóta fyrir næsta fiskveiðiár sem hefst í september þarf að hefjast handa strax við að undirbúa útboð ef ekki á bara að skipta viðbótinni milli kvótaeigenda,“ sagði Oddný og innti Hönnu Katrínu eftir afstöðu sinni til málsins, hvort sem viðbótarkvótinn yrði lagður til á næsta fiskveiðiári eða á öðrum tíma kjörtímabilsins.  

Vill frekar „prófa nýjan stofn“

Hanna sagði að sér þættu markmið Oddnýjar góð og nálgunin áhugaverð. Hins vegar teldi hún að það færi betur á því að „prófa nýjan stofn ef við færum þessa leið þegar hann kemur inn í íslenska lögsögu“.

„Ég óttast að þessi inngrip í þetta aflahlutdeildarkerfi gæti haft neikvæð áhrif á þá vinnu sem er að fara í gang í þessum töluðu orðum og ég bind svo miklar væntingar við,“ sagði hún og vísaði þar til þverpólitískrar nefndar um sjávarútvegsmál sem sjávarútvegsráðherra hyggst setja á fót. 

Þá sagðist Hanna Katrín ætlast til þess að málin yrðu rædd af miklum krafti og hreinskilni. „Það liggur fyrir að verkefni okkar er að skila tillögum að því hvernig skuli staðið að breytingum á greiðslufyrirkomulagi fyrir afnot af þjóðarauðlindum okkar inn í, til og með, heilbrigðiskerfið. Ég trúi því að sú vinna skili niðurstöðum sem hafi langtímahagsmuni í huga. Ég nýt þess að vera fulltrúi Viðreisnar í nefndinni. Ég hlakka til vinnunnar. Ég mun í anda Viðreisnar halda þar á lofti sjónarmiðum um útboðsleiðina.“ 

Engin uppboðsleið í stjórnarsáttmála

Viðreisn er sá flokkur sem talaði einna harðast fyrir uppboðsleið og „kerfisbreytingum“ í sjávarútvegi fyrir síðustu þingkosningar. Eftir kosningar myndaði flokkurinn ríkisstjórn með Bjartri framtíð og Sjálfstæðisflokknum. Í stjórnarsáttmála  ríkisstjórnarinnar eru engin fyrirheit gefin um að veiðiheimildir verði boðnar upp á kjörtímabilinu.

Í stjórnarsáttmálanum segir: „Kannaðir verða kostir þess að í stað ótímabundinnar úthlutunar verði byggt á langtímasamningum og samhliða verði unnið að mati á þeim kostum sem tækir eru, svo sem markaðstengingu, sérstöku afkomutengdu gjaldi eða öðrum leiðum, til að tryggja betur að gjald fyrir aðgang að sameiginlegri auðlind verði í eðlilegu hlutfalli við afrakstur veiðanna. Gæta þarf að langtímarekstraröryggi í greininni og stöðugleika í byggðum.“

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Pistill

Áskorun um #strákahitting

Leiðari

Óvinir valdsins

Fréttir

Bjarni um viðskipti með Sjóvá sem fóru til saksóknara: „Mér líst mjög vel á þetta mál“

Pistill

Þorum við að vera við?

Fréttir

Fékk nóg af hagræðingartali ráðherra: „Við erum hér alla daga að reyna gera okkar besta“

Fréttir

Sagðist sjálfur hafa greitt skuldirnar sem faðir hans yfirtók

Mest lesið í vikunni

Fréttir

Lögbann á frekari umfjöllun um viðskipti forsætisráðherra

Fréttir

Faðir Bjarna Benediktssonar greiddi upp skuldir hans vegna áhættuviðskipta

Pistill

Það sem Sjálfstæðisflokkurinn vill ekki að þú vitir um húsnæðismál

Pistill

Áskorun um #strákahitting

Pistill

Baráttan við TR-kerfið – mig grunaði aldrei hversu niðurlægjandi hún yrði

Leiðari

Óvinir valdsins