Fréttir

Sprengjuárás í Hafnarfirði: Snyrti- og flúrstofa í ljósum logum

Heimatilbúinni sprengju var kastað inn um glugga á snyrti- og flúrstofu við Dalshraun í Hafnarfirði í nótt. Lögreglan vill ekkert tjá sig um málið en samkvæmt heimildum Stundarinnar hafði eigendum fyrirtækisins verið hótað undanfarnar vikur. Stofan hafði aðeins verið opin í einn dag.

Stór sprengja á stærð við handbolta Lögreglan leitar þriggja manna vegna sprengjuárásarinnar í Hafnarfirði. Mynd: CCTV

Heimatilbúinni sprengju, líkust þeim sem sjá má í teiknimyndum, var kastað inn um glugga á snyrti- og flúrstofunni Immortal Art í Dalshrauni rétt fyrir klukkan tvö í nótt.

Allt ónýtt
Allt ónýtt Sprengjan olli miklum eldsvoða sem eyðilagði alla innanstokksmuni fyrirtækisins.

Stundin hefur undir höndum myndefni úr öryggismyndavél staðarins en þar sést sprengjan á gólfi snyrtistofunnar nokkrum andartökum áður en hún sprakk. Sprengingin olli mikilli eyðileggingu en samkvæmt upplýsingum frá slökkviliði höfuðborgarsvæðisins eru allir innanstokksmunir ónýtir.

Samkvæmt heimildum Stundarinnar hafði eigendum fyrirtækisins verið hótað undanfarnar vikur. Þá herma sömu heimildir að árásin í nótt og hótanirnar undanfarnar vikur hafi verið til þess að drepa samkeppni á flúrmarkaðinum og að lögreglan leiti nú að minnsta kosti þriggja manna sem taldir eru bera ábyrgð á sprengjuárásinni í nótt.

Við fjölfarinn veg
Við fjölfarinn veg Immortal Art opnaði í Dalshrauni en vegurinn er fjölfarinn og því ekki ólíklegt að einhver hafi séð þá sem köstuðu sprengjunni í nótt.

Opnuðu í gær

Það sem vekur athygli er að snyrti- og flúrstofan Immortal Art hafði aðeins verið í rekstri í einn dag. Hún opnaði í gær og af því tilefni var væntanlegum viðskiptavinum boðið að taka þátt í gjafabréfaleik á nýstofnaðri Facebook-síðu snyrtistofunnar. Rúmum átta klukkustundum eftir að þessi nýja snyrti- og flúrstofa lokaði eftir fyrsta daginn var sprengju kastað inn um rúðuna. Vitni sem skoðaði vettvanginn í Dalshrauni í morgun sagði að eldsvoðinn hefði einnig valdið skemmdum í öðru bili í húsnæðinu.

Stundin hafði samband við lögregluna á höfuðborgarsvæðinu sem vildi ekkert tjá sig um málið.

Uppfært 13:04

Stundin ræddi við nokkra sérfræðinga í flugeldum, meðal annars hjá hjálparsveitum landsins, en þeim bar saman um að hin „heimatilbúna“ sprengja hafi í raun og veru verið „tívolíbomba“ - öflug sprengja sem er bannað að selja hér á landi en er víða notuð í stórum flugeldasýningum. Á myndinni sem fylgir fréttinni sést í svokallaðan „tunnuþráð“ sem einkennir flugelda af þessari stærðargráðu.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Gagnrýnir að Íslandsbanki „steli“ hluta af áheitum á hana

Fréttir

Ung kona fær Íslandsbanka til að afnema frádrátt af söfnunarfé í Reykjavíkurmaraþoninu

Viðtal

Dreymdi alltaf um að búa í Danmörku

Fréttir

Thomas vísar á félaga sinn með hvarfið á Birnu Brjánsdóttur

Fréttir

„Reykjavík útbíuð af skrauti“

Fréttir

Tröllvaxin auglýsing H&M í gangveginum á Lækjartorgi

Mest lesið í vikunni

Fréttir

Gagnrýnir að Íslandsbanki „steli“ hluta af áheitum á hana

Fréttir

Ung kona fær Íslandsbanka til að afnema frádrátt af söfnunarfé í Reykjavíkurmaraþoninu

Fréttir

Robert Downey og Brynjar Níelsson lögmenn sama nektardansstaðar

Pistill

Kennari svarar ummælum Áslaugar Örnu

Fréttir

Brynjar þrætti fyrir að hafa verið lögmaður Bóhems en sendi bréf sem slíkur

Fréttir

Hann vildi leggja Ísland í eyði