Fréttir

Segir Viðskiptablaðið fara með dylgjur og lygar

Jóhanna Sigurðardóttir, fyrrverandi forsætisráðherra, segir ásakanir Viðskiptablaðsins á hendur sér og Oddnýju Harðardóttur vera dylgjur og lygar. „Mér er til efs að Viðskiptablaðið hefði boðið körlum upp á svona endemis rugl.“

Jóhanna Sigurðardóttir, fyrrverandi forsætisráðherra, bregst harkalega við ásökunum Viðskiptablaðsins um að Oddný Harðardóttir, þingkona Samfylkingarinnar, hafi fengið ráðherrastól í tíð vinstristjórnarinnar að launum fyrir að styðja málshöfðun á hendur Geir H. Haarde. 

„Það er opinbert leyndarmál innan Samfylkingarinnar að Oddný fékk á sínum tíma ráðherrastól að launum fyrir að styðja ákærurnar á hendur Geir H. Haarde í landsdómsmálinu og þar stóð hún vissulega sína plikt,“ segir í nafnlausum ritstjórnarpistli blaðsins sem birtist á vefnum í gær. 

Jóhanna gerir athugasemd við skrifin á Facebook og segir þau dylgjur og lygar. Viðskiptablaðið þurfi kúrs í jafnréttismálum, enda ólíklegt að blaðið hefði skrifað með sama hætti um karlmenn.

„Eru engin takmörk fyrir því hversu langt sumir fjölmiðlar ganga í dylgjum og lygi? Óþverrinn í Viðskiptablaðinu nær hæstu hæðum í dag,“ skrifar Jóhanna.

„Ég valdi Oddnýju í embættið af því hún er afburða skörp kona með mikla hæfileika til að gegna starfi fjármálaráðherra. Viðskiptablaðið á að biðja Oddnýju afsökunar á þessum dylgjum og fá um leið kúrs í jafnréttismálum. Mér er til efs að Viðskiptablaðið hefði boðið körlum upp á svona endemis rugl.“

Benedikt Jóhannesson, núverandi fjármála- og efnahagsráðherra, leggur orð í belg og segir að í fjármálaráðuneytinu sé fólk á einu máli um Oddný hafi vandað til verka þegar hún var ráðherra.

„Ég þurfti á sínum tíma að eiga lítils háttar samskipti við Oddnýju Harðardóttur sem fjármálaráðherra og hún kom mér fyrir sjónir sem íhugull stjórnmálamaður. Í ráðuneytinu ljúka allir upp einum rómi um að Oddný hafi sett sig vel inn í mál og unnið af stakri prýði. Allir eiga að njóta sannmælis, hvar í flokki sem þeir standa,“ skrifar hann. 

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Gagnrýnir að Íslandsbanki „steli“ hluta af áheitum á hana

Fréttir

Ung kona fær Íslandsbanka til að afnema frádrátt af söfnunarfé í Reykjavíkurmaraþoninu

Viðtal

Dreymdi alltaf um að búa í Danmörku

Fréttir

Thomas vísar á félaga sinn með hvarfið á Birnu Brjánsdóttur

Fréttir

„Reykjavík útbíuð af skrauti“

Fréttir

Tröllvaxin auglýsing H&M í gangveginum á Lækjartorgi

Mest lesið í vikunni

Fréttir

Gagnrýnir að Íslandsbanki „steli“ hluta af áheitum á hana

Fréttir

Ung kona fær Íslandsbanka til að afnema frádrátt af söfnunarfé í Reykjavíkurmaraþoninu

Fréttir

Robert Downey og Brynjar Níelsson lögmenn sama nektardansstaðar

Pistill

Kennari svarar ummælum Áslaugar Örnu

Fréttir

Brynjar þrætti fyrir að hafa verið lögmaður Bóhems en sendi bréf sem slíkur

Fréttir

Hann vildi leggja Ísland í eyði