Viðtal

Rætt við áberandi rasista: „Já! Þeir nauðga!“

Viðtal þar sem Bjartmar Oddur Þeyr Alexandersson ræðir við Margréti Friðriksdóttur, fyrrum prófkjörsframbjóðanda Sjálfstæðisflokksins og Örvar Harðarson, virkan meðlim Pírataspjallsins innihélt nokkrar áhugaverðar og vafasamar fullyrðingar.

Bjartmar, Margrét og Örvar takast á. Höndum var miskunarlaust fórnað í gegnum viðtalið.

Viðtal þar sem Bjartmar Oddur Þeyr Alexandersson ræðir við Margréti Friðriksdóttur og Örvar Harðarson birtist á vefnum nutiminn.is fyrr í dag. Í myndbandinu, sem er rúm þrjú korter á lengd, er tekist á um málefni flóttamanna og hælisleitenda, en fyrst og fremst hættuna sem þau vilja meina að Íslandi stafi af múslimum.

Í viðtalinu kom ýmislegt fróðlegt fram, þar sem Margrét og Örvar hentu stöðugt frá sér órökstuddum fullyrðingum sem Bjartmari tókst í hvert einasta skipti að reka aftur ofan í þau. Viðtalið, sem birtist fyrst í fullri lengd á nutiminn.is, má sjá hér fyrir neðan.

Nokkrar fullyrðingar sem héldur ekki vatni

Eitt af því sem Margrét hélt fram var að í sharía lögum Sadí-Arabíu kæmi fram að samkynhneigðir væru réttdræpir og að þeim ætti að henda fram af byggingum eða kveikja í þeim. Bjartmar benti henni á þá staðreynd að þetta væri rangt, að ekkert í lands- eða hegningarlögum Sádí-Arabíu væri á þessa leið. Var Margrét ósammála því, en sagði Bjartmar henni að það skemmtilega við staðreyndir væri að það þýddi ekkert að vera ósammála þeim, því þær væru einfaldlega til staðar. „Ég er að segja staðreyndir líka“ sagði Margrét þá.

Reyndi Bjartmar ítrekað að fá upp úr þeim hver hin raunverulega hætta væri hér á landi, og hvernig hún myndi birtast. Sagði Margrét þá að um leið og múslimar eru orðnir þrjú prósent þjóðar fari þeir að valda vandamálum. Benti Bjartmar þá á að um 3.000 múslimar væru nú þegar á landinu, og spurði hvort þeim mætti þá fjölga um 7.000 svo þeir næðu upp í 3% sem Margrét talaði um. Sagði Margrét að það væri í lagi, en ef þeir yrðu fleiri þá yrði það stórt vandamál.

„Ég er að segja staðreyndir líka“

Einnig sagði hún að múslimar í Danmörku, sem eru um 5.2% væru að hirða 50% af öllu velferðarkerfinu þar í landi, og á þá líklega við að þeir taki til sín um helming fjárhagsaðstoðar danska ríkisins í velferðarmálum. Rak Bjartmar þessa fullyrðingu, sem sjálfstæðismaðurinn Gústaf Adolf hélt áður fram, ofan í Margréti, þar sem engin gögn eru til staðar sem styðja þessa staðhæfingu. Væri hún sönn hefði hver einasti múslimi í Danmörku tekjur frá ríkinu upp á rúmar 28 milljónir, sem þeir hafa ekki.

Vill afnema trúfrelsi

Þegar talið barst að þeirri fullyrðingu að flóttamenn og hælisleitendur væru líklegri til að nauðga, hrópaði Margrét „Já! Þeir nauðga!“ Fór Bjartmar þá yfir tölur frá Sameinuðu Þjóðunum sem sýndu fram á að ekkert væri til í þeim staðhæfingum. Í kjölfarið sagði Margrét þá að Sameinuðu Þjóðirnar hefur ekkert rétt fyrir sér í einu og öllu.

„Já! Þeir nauðga!“

Fór Bjartmar svo yfir könnun MMR sem sýndi fram á að 85% íslendinga vildu taka á móti flóttafólki. Tóku Margrét og Örvar slælega í þá fullyrðingu, vildu að spurt yrði sérstaklega um múslima, og settu spurningamerki við stærð könnunarinnar. Hélt Margrét svo áfram að fullyrða um vandamálin sem fylgdu múslimum, og nefndi klæðaburð í sundi sem dæmi, að konur væru að fara í búrkum ofan í laugarnar. Engin dæmi eru um það á íslandi að konur hafi farið í búrkum í sund, en hinsvegar er konum heimilt að fara í sundfatnað sem hylur mjög stóran hluta líkamans.

„Fokk mannréttindasáttmáli Sameinuðu Þjóðanna, fokk mannréttindasáttmáli Evrópu...“

Bjartmar reyndi svo að fá fleiri ummæli frá Örvari, sem varð í gegnum viðtalið ítrekað mjög harkalega undir orðaflaumi Margrétar.

Spurði Bjartmar út í frægar færslur hans inn á Pírataspjallinu, þar sem Örvar hefur dælt inn hlekkjum á misvafasamar fréttasíður þar sem ágæti múslima er dregið í efa, og Youtube myndbönd með svipuðu efni. Sagðist Örvar hafa stundað þessa iðju til þess að „taka umræðuna.“ Margir væru ómálefnalegir en hann vildi opna á þessi mál, og ræða múslima.

Fór Bjartmar þá yfir nokkur ummæli Örvars, þar sem hann sagði meðal annars „Fokk mannréttindasáttmáli Sameinuðu Þjóðanna, fokk mannréttindasáttmáli Evrópu, það ætti mögulega að endurskoða stjórnarskránna og afnema trúfrelsi í landinu.“ Brosti Örvar við þessum ummælum sínum, og gekk enn lengra með því að segja að hann teldi að það ætti ekki að vera trúfrelsi í landinu, til þess að ríkið gæti bannað byggingu mosku á Íslandi.

Mótmæla byggingu mosku

Varðandi moskuna þá sagðist Margrét ekki vilja sjá hana byggða, vegna þess að henni myndi fylgja frekari öfgar og hryðjuverk. Þegar Bjartmar benti henni á að engar rannsóknir sýndu fram á að þau ummæli stæðust, sagði Margrét að verið væri að loka annaðhvort 20 eða 200 moskum í Frakklandi vegna þess að þar væri stöðugt verið að skipuleggja hryðjuverk. Bjartmar tók þá fram að þessar lokanir væru vegna neyðarlaga sem sett hefðu verið í Frakklandi, og að þau lög hefðu mætt mikilli andstöðu vegna augljósra mannréttindabrota sem þau fælu í sér.

Aðspurður sagðist Örvar ekki vilja svara spurningunni um moskuna, en fór Bjartmar þá yfir ummæli hans fyrr í viðtalinu þar sem hann sagðist vilja fá stjórnvöld til þess að stöðva bygginguna, og opnaðist viðmælandi við það. Örvar sagði þá: „Ég vil persónulega ekki sjá þetta í íslensku samfélagi, þetta bara hefur ekkert að gera hérna í íslensku samfélagi, af því þetta stangast allt of mikið á við okkar gildi og leiðir til árekstra.“

„Sameinuðu Þjóðirnar stunda gyðingahatur. Ég get sannað það!“

Í umræðunni um glæpi sem múslimar myndu fremja á Íslandi vegna trúar sinnar, tókst Bjartmari að koma þeim skilaboðum á framfæri að það væri sambærilegt við Ísrael, sem fremdi stríðsglæpi og landtöku sem brýtur fjölda alþjóðlegra laga. Var Margréti þá nóg boðið og sagði „Nú ertu farinn að tala eins og UN gyðingahatari, þannig ég ætla ekki að svara þessu. Við förum út í annað.“ Henni tókst þó ekki að fara út í annað því hún gat ekki staðist að bæta við „þetta er pjúra rasismi sem þú ert að segja núna,“ og svo seinna „Sameinuðu Þjóðirnar stunda gyðingahatur. Ég get sannað það!“

Hér er svo viðtalið í fullri lengd, en það má einnig finna, þar sem það birtist upprunalega, á vefnum nutiminn.is

 

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Jón Steinar þrýsti á að Robert Downey fengi uppreist æru „eftir þá hrakninga sem hann lenti í“

Fréttir

Guðni mátti ekki sjá minnisblöð um Downey og Hjalta: „Ber að eyða því í pappírstætara“

Fréttir

Frásagnir kvenna í læknastétt: „Það þarf nú bara að þvinga lykkjuna upp á ykkur “

Pistill

Með bakið upp við vegginn

Fréttir

Pressan borgaði ekki af jeppa Björns Inga og stefnir í þrot út af ógreiddum iðgjöldum starfsmanns

Pistill

Hvernig er hægt að losna við Trump?

Mest lesið í vikunni

Rannsókn

„Skelfilegar sögur“ úr Kvikmyndaskóla Íslands

Fréttir

Áralangar deilur innan fjölskyldu Ásmundar Einars hafa ratað til lögreglunnar

Fréttir

Björn Ingi keypti hús með auglýsingasamningi og kúlulánum frá GAMMA

Fréttir

Jón Steinar þrýsti á að Robert Downey fengi uppreist æru „eftir þá hrakninga sem hann lenti í“

Fréttir

Guðni mátti ekki sjá minnisblöð um Downey og Hjalta: „Ber að eyða því í pappírstætara“

Pistill

Okkar eigin Weinstein