Fréttir

Fjölmiðlafræðingur þýðir kínverskan áróður fyrir Íslendinga

Íslenskur fjölmiðlafræðingur þýðir og skrifar fréttir fyrir kínverska fréttasíðu sem fjallar um kínverska drauminn, velgengni kínverskra vara og ótrúlega hækkun verðbréfa.

Kínverski herinn Liðsmenn kínverska hersins í skrúðgöngu í Moskvu 9. maí síðastliðinn vegna 70 afmælis endaloka seinni heimsstyrjaldarinnar. Mynd: www.kremlin.ru

Einn sérkennilegri vefmiðill á íslensku sem finnst nefnist gbtimes.com.  Allar fréttir á síðunni fjalla á einn eða annan hátt um Kína og gagnrýnar fréttir finnast ekki. „Keníubúar elska kínverska síma“, „4200% verðbréfahækkun í Kína“ og „Togari byggður í Kína“ eru dæmi um fyrirsagnir sem finna má á síðunni. Meirihluti fréttanna á síðunni eru þýddar en þó má finna fréttir um séríslensk málefni, að vísu tengdar Kína. Það er til að mynda sagt frá heimsókn Illuga Gunnarssonar til Kína ásamt forsvarsmönnum Orku Energy nýverið.

„Þetta er ekki áróðursíða, nei, en ég myndi segja að fréttavalið væri ritstýrt.“

Ekki verður betur séð að aðeins einn íslenskur starfsmaður vinni hjá gbtimes, Andri Már Sigurðsson fjölmiðlafræðingur. Hann segist í samtali við Stundina ekki telja gbtimes vera áróðurveitu þó hann viðurkenni að hann fái handleiðslu að utan. „Þetta er miðill sem á að deila kínverskum fréttum til Íslendinga í Kína eða þeirra sem hafa áhuga á Kína,“ segir Andri Már. Spurður um hvort síðan sé ekki beinlínis áróðursíða segir hann: „Þetta er ekki áróðursíða, nei, en ég myndi segja að fréttavalið væri ritstýrt.“

Aðallega að þýða

Andri Már segir að hann hafi byrjað að vinna hjá gbtimes eftir að hann sá auglýsingu á netinu þar sem óskað var eftir lausamanni til að þýða enskar fréttir yfir á íslensku. Hann hafi sótt um og fengið starfið. „Ég fór á „freelancer“ vefsíðu á alnetinu, þar sem verið var að leita af einhverjum til að þýða af ensku yfir á íslensku. Þetta er allt þýtt, ég er ekkert að skrifa. Ég geri það reyndar ef það kemur eitthvað Íslandstengt. Það hefur eiginlega bara verið af vef ráðuneytanna eða fótboltafréttir. Ef ég rekst á eitthvað í Fréttablaðinu eða Morgunblaðinu þá set ég það inn. Ég er ekkert að skrifa um það sem gerist í Kína, það er að segja sem er ekki Íslandstengt,“ segir Andri Már. Hann segir að ekki sé um að ræða fullt starf og það sé sömuleiðis tímabundið.

Eiga finnska Rondo

Samkvæmt heimasíðu er gbtimes í eigu félagana FutuVision Group og Global Broadcasting Media Consulation Co. Ltd. Markmið félagsins er að eigin sögn að stuðla að auknum skilningi á milli menningarheima.

Höfuðstöðvar þessa félags eru í Finnlandi og eigandi þess er sagður vera Yinong Zhao. Í frétt YLE, finnska ríkisútvarpsins, er greint frá kaupum félagsins á Rondo útvarpsstöð, sambærilegri stöð og þeirri hér á landi, af finnska ríkinu. Í þeirri frétt er einfaldlega talað um áróðursmiðil Kínverja.

Andri Már gefur lítið upp spurður um eignarhaldið. „Ég er með minn tengilið inn í þetta. Ég veit nokkurn veginn fyrir hvern hann vinnur. Þetta er þannig að það eru nokkrir milliliðir þarna. Höfuðstöðvarnar eru í Finnlandi, það er einhver skemmtileg tenging þarna á milli,“ segir Andri Már.

Kínverska „kúlan“ springur ekki

Lítum á nokkur dæmi um fréttir á vefmiðlinum. Í fréttinni um margþúsundfalda hækkun í verðbréfum í Kína er sagt frá félaginu Beijing Baofeng Technology. Verðbréf félagsins hækkuðu vissulega gífurlega en líkt og Financial Times hefur bent á þá er það fremur merki um bólu en heilbrigði. Félaginu er lýst sem froðu í þeirri frétt.

„Yfirvöld í Peking hafa lagt sig fram við að lokka fyrirtæki til þess að skrá sig í Kína til að efla enn frekar hagkerfi landsins.

Gbtimes er ekki eins gagnrýnið á þetta félag. „Yfirvöld í Peking hafa lagt sig fram við að lokka fyrirtæki til þess að skrá sig í Kína til að efla enn frekar hagkerfi landsins. Viðskipti með verðbréf í landinu hafa aukist og er auðveldara fyrir fyrirtæki að skrá sig á meginlandinu frekar en að fara á erlenda markaði. [...] Kínversk yfirvöld, ásamt yfirvöldum á staðnum gefa tæknifyrirtækjum skattaafslátt gegn því að skrá sig á innlendum markaði. Þetta hefur skapað nokkurs konar fullkomið ástand fyrir tæknifyrirtæki til að uppskera á verðbréfamarkaði,“ segir í þeirri frétt.

„Sumir sérfræðingar trúa því að kínverski verðbréfamarkaðurinn muni halda áfram að vaxa dyggilega á næstunni.“

Í frétt gbtimes er örlítið minnst á mögulega bólu, þótt hún sé að vísu þýtt sem kúla, og er hún í raun sögð ekki vera til staðar: „En ekki eru allir svo svartsýnir, sérstaklega þegar kemur að því að kúlan muni springa í framtíðinni. Sumir sérfræðingar trúa því að kínverski verðbréfamarkaðurinn muni halda áfram að vaxa dyggilega á næstunni.“

Kínverjar furða sig á Kate Middleton

Gbtimes fjallar þó ekki eingöngu um viðskipti tengd Kína, það má líka finna furðufréttir. Hér má finna frétt um fjaðrafok kínverskra netverja vegna þess að Kate Middleton, prinsessa í Bretlandi, fór út fyrir hússins dyr aðeins tíu tímum eftir að hún fæddi dóttur sína á dögunum. „Umræðan einblíndi á hina nýju móður sem hefði átt að „sitja út mánuðinn“ sem er 2000 ára gömul kínversk hefð fyrir konur sem eiga að eyða 30 dögum inni eftir að hafa fætt barn. En það á að halda þeim hlýjum og hjálpa þeim að endurnýja orkuna sína,“ segir í frétt gbtimes.

„Kínverski draumurinn: einfaldur, kraftmikill, vinsæll.“

„Kínverski draumurinn“

Í einni fréttinni frá mars í fyrra er fjallað um kínverska drauminn. Þrátt fyrir að greinin sé skráð undir flokkinn skoðun þá er augljóst að ekki er um að ræða pistil. „Bestu pólitísku loforðin eru oftast laus við smáatriði. Kraftur slagorðs kemur oftar en ekki ekki frá því sem það segir, heldur frá því sem þú heldur að það sé og tengir við drauma þína. Allir eiga sér drauma og þrár. Þegar Xi Jinpeng varð aðalritari Kommúnistaflokksins í Kína (CPC), sem er valdamesta starf Kína, í nóvember 2012, náði hann að afla sér fylgis með því meðal annars að tala um kínverska drauminn (中国梦, Zhōngguó mèng).“ Svo hljóðar inngangur fréttarinnar „Kínverski draumurinn: einfaldur, kraftmikill, vinsæll“ sem er nokkurskonar lofræða um Xi Jinping.

„Kínverski draumur Xi virðist því hafa verið skynsamleg ákvörðun og gæti aðstoðað kommúnistaflokkinn að sigrast á vissum hættum.“

Fréttaritari talar svo við almenning og spyr hver sé kínverski draumur viðkomandi og nefna sumir ríkidæmi, meðan aðrir vilja eignast kærasta. „Svo virðist vera sem að slagorð Xi hafi aðstoðað fólk við að láta drauma sína rætast og það sem meira er að fólk eigi sér drauma sem geta ræst. [...] Kínverski draumur Xi virðist því hafa verið skynsamleg ákvörðun og gæti aðstoðað Kommúnistaflokkinn að sigrast á vissum hættum,“ segir í fréttinni.

„Fyrir þá sem óttast drekann í austri þá ætti kínverski draumurinn að vekja traust frekar en ótta.“

Enginn þarf þó að óttast Kína samkvæmt fréttaritara gbtimes: „Fyrir þá sem óttast drekann í austri þá ætti kínverski draumurinn að vekja traust frekar en ótta. Það er enginn ótti í breytingunum. Eins manns gróði þarf ekki endilega að merkja annars manns tap. Kínverski draumurinn er endurvakning á kínversku þjóðinni sem er aðalsmerki stjórnar Xi. En vissulega geta hlutirnir alltaf breyst, líkt og viðmót fólks gagnvart Obama sem breyttist úr Hope í Nope.“

What is the China Dream?
video update of all the latest developments from the 2014 Chinese parliamentary sessions.

 

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Fréttir

Vigdís Hauksdóttir lætur víkinga bera sig í kosningamyndbandi

Aðsent

400 manns senda Katrínu Jakobsdóttur opið bréf vegna „vanrækslu stjórnvalda“ í máli Hauks

Fréttir

Segir ummæli Brynjars ófagleg og afvegaleiða umræðu

Aðsent

Typpi, hvalir og Kristján Loftsson

Fréttir

Inga Sæland segist ekki vera hugsjónalaus afæta

Fréttir

Kallar tilmæli Svandísar „veruleikafirringu“ – Ljósmæður telja sig hafa gert samning

Mest lesið í vikunni

Fréttir

Björn Ingi Hrafnsson ógjaldfær

Fréttir

Ætlar ekki að segja sig úr Sjálfstæðisflokknum

Viðtal

Finnur mun meira fyrir fötluninni á Íslandi

Fréttir

Forstjóri Isavia segir miklar launakröfur áhyggjuefni: Hækkaði sjálfur í launum um 400 þúsund milli ára

Fréttir

Vigdís Hauksdóttir lætur víkinga bera sig í kosningamyndbandi

Fréttir

Starfsfólk Árnastofnunar reitt við Ríkisútvarpið