Það er svo satt og rétt þegar sagt er að við séum að upplifa hér fordæmalausa tíma. Úr öllum hornum heyri ég fólk tala um að ástandið í dag sé eins og lygasaga, sé súrealískt og margir hafa á orði að þeim líði eins og þau séu stödd í vísindaskáldsögu. Mér sjálfri finnst ég stödd í ótrúlegri sögu sem má finna í þykkri bók; sögu sem ég hefði aldrei áhuga á að lesa sjálf því hún er svo niðurdrepandi og boring. Og í þessarri sögu er ég föst.

En það þýðir ekki að væla yfir ástandinu. Bara halda ró sinni, fara eftir fyrirmælum Almannavarna og WHO, og þvooooo hendur. Svo má gera eitthvað sjúklega skemmtilegt þegar fólk er fast heima. Nota ímyndunaraflið og skapa einhverja dásemd. Það er til dæmis hægt að:

- hafa tiltektarkeppni milli fjölskyldumeðlima. Hafa til dæmis tímatöku á tiltekt í herbergjunum og fær þá vinningshafinn verðlaun sem hefur verið samið um áður.

- skella upp jólatrénu og setja allan hreina þvottinn undir tréð. Einn fjölskyldumeðlimur sér um að draga eina flík úr hrúgunni og færa eigandanum sem brýtur hana saman meðan aðrir í fjölskyldunni fylgjast með.

- lesa allar ólesnar bækur sem til eru á heimilinu og hafa jafnvel staðið óhreyfðar árum saman.

- allir í fjölskyldunni velja eina fæðutegund og saman útbýr fjölskyldan máltíð sem samanstendur af þeim matartegundum sem valdar voru. Getur endað á áhugaverðan hátt!

- halda matarboð með vinafólki sem fer fram í gegnum videóspjall. Allir elda sömu máltíðina, setjast til borðs og spjalla saman í gegnum netið.

- skreppa í Vínbúðina og velja helling af bjórum sem fólk hefur ekki smakkað. Ná svo í appið Untappd þar sem hægt er að gefa bjórunum einkunn og skála við alla vinina sem eru þar.

- grafa ofan í jólaskrautskassann og fara í leikinn „Falið jólaskraut“ þar sem einn fjölskyldumeðlimur kemur jólaskrauti fyrir í húsakynnunum og restin af fjölskyldunni þarf að reyna að finna út hvaða skraut var valið og hvar skrautið var sett.

- koma sér fyrir við glugga og fylgjast með hvort einhver labbi framhjá. Ef það gerist þurfa fjölskyldumeðlimir að búa til sögu um viðkomandi. Hver þetta er, hvert er viðkomandi að fara, hvernig líf viðkomandi manneskju er, o.s.frv.

- fara í leikinn „Er þetta sönn saga eða bullusaga“ þar sem foreldrar skiptast á að segja börnunum sögur af sér, sem geta annað hvort verið sannar eða lognar. Síðan eiga börnin að giska hvort sögurnar eru sannar sögur eða bullusögur.

- mjög skemmtilegt er að búa til Snapchathópa þar sem meðlimir segja hver öðrum frá skriflega og með myndum/myndböndum hvernig hið daglega líf er um þessar mundir. Þetta getur heldur betur létt lundina, bíður upp á svolitla saumaklúbbsstemmningu þar sem fólk getur pústað. Fengið að létta á sér og fundið fyrir stuðningi frá fólki sem er líka að berjast við hið daglega líf um þessar mundir.

- halda Eurovisionpartý með fjölskyldumeðlimum yfir gömlum Eurovisionkeppnum. Hægt að finna margar á Youtube. Hlæja saman að tískunni hér áður fyrr og stemmningunni. Getur ekki klikkað!

- fara í skítnóg af göngutúrum þar sem það er gott að vera úti í fersku lofti á þessum vátímum. Poppa má þá upp á alls kyns hátt, meðal annars:

• Telja bangsana í gluggum á höfuðborgarsvæðinu.

• Telja brunahænur sem gengið er framhjá.

• Telja hve mörg götuheiti sem á vegi fólks verður byrja t.d. á B eða E eða hvað sem er.

• Telja alla bíla sem eru t.d. rauðir, hafa tölustafinn 8 í bílnúmerinu, hafa bókstafinn Z í bílnúmerinu, eru bílnúmeralausir, með brotna rúðu, eiga að fara í skoðun 2022, o.s.frv.

• Leggja bílnum einhvers staðar og fara í góðan göngutúr. Þurfa svo að reyna að finna leiðina til baka án þess að fara sömu leið.

- búa til flöskuskeyti og henda í sjóinn.

Fólk þarf ekki að láta sér leiðast, svo mikið er víst. Endilega kommentið fleiri hugmyndir að einhverju hressandi að gera í samkomubanninu.