Ferfætllingaflokkurinn
Stjúphvolpurinn og Stjúpkötturinn: Stjúpi, við ætlum að stofna flokk.
Ég: Nú, hvað á hann að heita?
Stjúpkötturinn: Ferfætlingaflokkurinn.
Ég: Uhh, ég held að það séu til a.m.k. tveir ef ekki þrír slíkir flokkar á Íslandi, Viðreisn og Björt framtíð skríða á fjórum fótum fyrir íhaldinu. Og Framsókn hefur löngum sýnt því hundslega undirgefni.
Stjúphvolpurinn (urrar reiðilega): Þetta eru hundfjandsamleg ummæli! Það ætti banna slíkt!
Ég: Ókei, ókei, fyrirgefðu, segjum bara að Framsókn hafi oft flatmagað fyrir Íhaldinu.
Stjúphvolpurinn: Allt í lagi, gleymum þessu.
Ég: En segið mér meira um flokkinn, hver eru helstu baráttumál hans?
Stjúpkötturinn: Sko, okkur finnst að réttindi okkar ferfætlinga séu fyrir borð borin, þess utan krefjumst við betra fóðurs. Gæsalifur á sunnudögum, takk!
Ég: Hvað heldurðu að gæsirnar segi við því?
Stjúpkötturinn: Þær eru ekki ferfætlingar.
Ég: Ég þóttist nú vita það. En hvernig á að stjórna flokknum ykkar?
Stjúpkötturinn: Ég verð náttúrulega formaður, ég meina forferfætlingur…
Stjúphvolpurinn: Grrr, alltaf sama frekjan í þér, fitubollan þín!
Stjúpkötturinn: Grrr, ég er ekkert feitur, ég er bara með þy…
Ég: …kkan feld.
Stjúpkötturinn: Grr, ég skal lúskra á þér, vondi hvolpur (þeir fara að slást).
Ég (tek í hnakkadrambið á báðum): Tekið hef ég hér hvelpi tvö, úps ég meina hvolp og kött. Ef þið hættið ekki að slást þá fáiði engan kvöldmat!
Stjúpköttur og –hvolpur (bljúgir): Við skulum lofa að vera þægir!
Stjúpkötturinn (með lygaramerki á loppunni): Elsku voffi!
Stjúphvolpurinn (líka með lygaramerki): Elsku kisa!
Ég: Gjöriði svo vel! Dýrindis dýrafóður!
Stjúphvolpurinn og –kötturinn: Húrra fyrir fóðrinu, húrra fyrir stjúpa!
Hinir baráttuglöðu stjórnmála-ferfætlingar hámuðu í sig fóðrið, lögðust svo hlið við hlið og sváfu svefni hinna réttlátu.
Athugasemdir