Hafa brjóst nýlega farið fyrir brjóstið þitt? Er nútímalist og/eða klassísk list of klámfengin og ögrandi.

Þá máttu vita það að þú ert ekki ein/einn. Þú ert ekki eina fórnarlamb Borghildar Indriðadóttur og Gunnlaugs Blöndal. Það eru fleiri sem þjást. Nú þarft þú ekki lengur að þjást í þögn.

Ég vil þakka Sigmundi Davíð, fyrrum forsætisráðherra, fyrrum kröfuhafa í íslensku bankanna og áhugamann um varðveislu hafnargarða, fyrir að stíga fram og andmæla þessari hrikalegu klámvæðingu.

Það er nefnilega ekki hægt að kalla allt list. Sumt er bara brjóst.

Þessu var nemendum listaháskólans boðið upp á að labba framhjá á hverjum degi í heila viku. Næsta skref hjá Sigmundi Davíð hlýtur að vera lagafrumvarp. Hann getur þá leitað í smiðju síns helsta átrúnaðargoðs sem svo sannarlega lét ekki listamenn komast upp með hvað sem er.

Líkt og Jónas Jónsson frá Hriflu gæti Sigmundur sett upp sýningu á óæskilegri list. En það þyrfti helst að vera í sýningarsal með skyggðum gluggum til að gæta velsæmis. Nektin er truflandi.

P.S. myndin með blogginu er forngrísk, annað hvort gerð á þriðju öld fyrir krist af listamanni í því sem þá var grískumælandi hluti Tyrklands, eða síðari tíma rómversk endurgerð, og sýnir karlkyns skógarandi. Hún er kennd við kardínálann Francesco Barberini sem átti hana í byrjun nítjándu aldar og særði líkast til ekki blygðunarkennd hans svo, þar sem hann greiddi fyrir viðgerðir á henni. Hana má finna í Glyphotekinu í Munchen.