Það þarf ekki mikinn speking til að spá því að aldrei verði lagður sæstrengur til Íslands og aldrei haldnar neinar þjóðaratkvæðagreiðslur þar að lútandi. Einfaldlega vegna þess að innan fárra ára verði fátt jafn úrelt og einmitt sæstrengur. Að halda þjóðaratkvæðagreiðslu um hann væri eins og að láta þjóðina kjósa um símastaura eða ritvélar.

Því að það eru vel á annað hundrað ár síðan fyrstu tilraunir með þráðlausan flutning rafmagns hófust í heiminum. Serbísk-bandaríski uppfinningamaðurinn Nikola Tesla byggði hinn svokallaða Tesla-turn í New York-fylki rétt eftir aldamótin 1900.  Upphaflega var turninn hugsaður fyrir símskeyti og myndsendingar en svo var markið sett hærra og stefnt að þráðlausum flutningi orku. Þvínæst var stefnt að ótakmarkaðri framleiðslu á orku sem mætti senda þráðlaust um veröld víða. Það hljómaði eins og geðbilun en hélt þó áfram um langa hríð áður en Tesla missti fjárfestana. 

Tæpast myndi það gleðja olíufyrirtæki dagsins í dag ef einhver kæmi færandi hendi með lausn á orkuvanda heimsins sem og orkuflutningi — og biti höfuðið af skömminni með því að ætla heila klabbinu að vera ókeypis. 

Af ótakmarkaðri orkuauðlind Tesla fer fáum fregnum. Kannski var hún rugl, kannski mætti setja formúgur í að athuga hvort hann hafi verið kominn á gott spor. En staðreyndin er hins vegar sú, eins og lesa má t.d. í fréttatilkynningu frá 2017, hér, að tækni þráðlausra orkuflutninga fleygir fram. Nú þegar væri hægt að hlaða símann sinn í O Porto í Portúgal með þráðlausri raforku frá Salamanca á Spáni. Kannski er það þess vegna sem Evrópusambandið notar aldrei orð eins og sæstreng heldur talar um „burðarmannvirki yfir landamæri.“

Það þarf því ekki mikinn tæknispeking til að spá því að þegar upp er staðið verði það sem nú er talað um sem stærstu framkvæmd Íslandssögunnar, að leggja sæstreng, kannski ekki meira mál en að hamra nokkrar skipanir á lyklaborð til að breyta stillingu gervihnattar. 

Ekki að ég hafi skoðanir í þeim málum. Eða sérstaka tækniþekkingu. Eða einu sinni meira en hálfvolgan áhuga. Mér datt bara samt í hug að uppfræða fáfróðan almenning í þessum efnum. 

Svona er ég nú góður.