Náttúruperlan Eldvörp á Reykjanesi er algjörlega einstök. Úr einum aðalgígnum í miðri gígaröðinni, sem er um 10km löng, og í hrauninu umhverfis, rýkur jarðhitinn eins og gosi sé nýlokið. Gígarnir mynduðust hins vegar í mikilli eldgosahrinu sem skók Reykjanesið á 13. öld. Jarðgufan sveipar umhverfið allt mikilli dulúð og gerir þessa náttúruperlu svo kynngimagnaða að erfitt er að lýsa því með orðum. Ég reyni að koma því til skila í myndbandinu sem hér fylgir en auðvitað jafnast ekkert á við upplifunina sjálfa - að vera á staðnum.

Því miður verður þetta magnaða svæði brátt eyðileggingunni að bráð þar sem Grindavíkurbær hefur veitt HS Orku leyfi til tilraunaborana á svæðinu þrátt fyrir neikvæða umsögn Skipulagsstofnunar varðandi þau óafturkræfu umhverfisáhrif sem þær munu hafa í för með sér. Gert er ráð fyrir fimm risastórum borteigum nánast ofan í gígaröðinni, sem hver og einn verður á bilinu  4 – 5 þúsund fermetrar að stærð.

Reykjanes Geopark er undarlegt apparat sem stofnað var af Grindavíkurbæ og HS Orku. Talsmaður þess, bæjarstjórinn í Grindavík, lét hafa það eftir sér að í markaðssetningu jarðvangsins yrði m.a. lögð áhersla á jarðminjar. Sú yfirlýsing verður að teljast furðuleg í ljósi þess að á sama tíma veitir Grindavíkurbær HS Orku leyfi til að að eyðileggja merkilegustu jarðminjar svæðisins.

Ekki nema bæjarstjórinn hafi meint að áherslan væri sú að eyðileggja þær?