Þessi færsla er meira en 8 ára gömul.
Vúlvuspá 2016
Árið 2015 var erfitt ár. Ýmsir erfiðleikar heimsins urðu okkur bómullarhnoðrum Íslands ansi raunverulegir. Á Íslandi er líka erfitt fyrir mjög marga. Ég ætla hins vegar ekki að tíunda þessa erfiðleika hér, enda er ég enginn fræðimaður og nenni því bara engan veginn. Þessi spá kemur hins vegar djúpt úr mínum vúlvurótum og er helber óskhyggja um betri heim.
Á næsta ári mun fólk fara að fatta betur að við erum öll meira og minna föst í eigin reynsluheimi og túlkum sömu hlutina afar ólíkt. Þetta veldur endalausum misskilningi og óþarfa togstreitum sem þó kannski eru stundum nauðsynlegar. Fólk mun smám saman læra að spyrja spurninga eins og: hvernig ert þú að túlka þetta? Útfrá hvaða forsendum sérðu þetta? Þetta mun leiða til þess að óþarfa tíma og öðrum verðmætum verður síður sóað enda erum við búin að besta okkur í því. Fólk mun komast að því að yfirleitt hafa allir sama markmið um farsæld og betri heim, sumir fyrir alla en aðrir reyndar bara fyrir sig. Við getum þá takmarkað rökræður okkar við að finna út hvaða leiðir séu bestar til að ná markmiðunum en þurfum ekki að reyna sverta markmið hvors annars sem slík. Markmið tengjast nefnilega oftast gildum okkar um hvað skiptir okkur máli og því persónum okkar. Það er svo sorglegt að falla stöðugt í þá gryfju að gera lítið úr persónu hvers annars þegar við erum að reyna að finna út hvaða leiðir eru bestar til að ná farsæld. Enda rökvilla í sjálfu sér.
Kannski er ég fræðimaður eftir allt saman? Búin að sjóða saman Prótagórasi, Hegel og Aristótelesi og krydda með ýmsu öðru í 200 orðum. Eða nei, ég er kennari og hef þá furðulegu áráttu að reyna stöðugt að draga saman aðalatriðin fyrir sjálfri mér og öðrum, ég læt fræðimennina um hitt. Ég er líka voðalega svag fyrir því að reyna að komast að því út frá hvaða forsendum fólk setur mál sitt fram. Ekkert er jafn frústrerandi og að fylgjast með fólki rífast og rökræða útfrá ólíkum forsendum án þess að átta sig á því. Fólk er meira að segja næstum alltaf sammála; ef það bara myndi staldra aðeins við.
Nei djók, ég óska öllum bara kærleika og frið í hjartað sitt ... vúlvuknús 2016
Fleiri færslur frá höfundi
Þurfum við að græða á innflytjendum?
Algengt viðkvæði í umræðu um fólk sem flyst hingað frá öðrum löndum af misjöfnum aðstæðum er að fólkið nýtist hér til vinnu og að Ísland græði svo mikið á því. Vissulega auðgar að hafa sem fjölbreyttast mannlíf. Fólk með ólíka menningu, sýn, trúarbrögð, lífstíl o.s.frv. Ég eiginlega grátbið fólk sem er andstæðan við perukökuétandi þjóðernissinna að flytja til Íslands, við...
Er ég ekki bara að sóa atkvæði mínu?
Hvers vegna í ósköpunum ætti ég að kjósa litla flokkinn sem mælist yfirleitt í kringum 2% í skoðanakönnunum? Er ég ekki að sóa atkvæði mínu? Miðað við skoðanakannanir eru þeir ekki að ná inn manni og í seinustu kosningum fengu þeir bara um 3,5% atkvæða. Aðalmarkmiðið með þessum kosningum er líka að koma sérhagsmunastjórninni frá og það er óþolandi að...
Flóttamenn eða öryrkjar? Er það spurningin?
Fátt fer eins mikið í taugarnar á mér og ákveðinn málflutningur sem er algengur um þessar mundir. Hann snýst um að við þurfum að hugsa betur um öryrkja og aðra hópa sem standa höllum fæti hér á landi áður en við förum að hjálpa fólki frá í útlöndum. Ástæða þess er margföld. Í fyrsta lagi af því að þetta hljómar...
Brotið á lýðræðisrétti ÞÍNUM
Það skýtur óneitanlega skökku við að á Fundi Fólksins sem haldinn var um helgina þar sem almenningi átti m.a. að vera gefinn kostur á að kynna sér flokka sem bjóða fram til Alþingis skyldu einungis útvaldir fá að vera með. Formaður eins af litlu flokkunum var mættur á viðburð sem var auglýstur sem ,,Stjórnmálabúðir – Upptaktur kosninga“. Hann var með...
Athugasemdir