Í tilefni af umræðum um Wintris-mál Sigmundar Davíðs hef ég orðið var við að minni sumra virðist nokkuð farið að trosna um hvað gerðist í viðtalinu fræga sem sýnt var í hinum sérstaka Kastljóss-þætti. Einn mann sá ég á Facebook halda því fram að Sigmundur Davíð hefði strax tekið fram - um leið og sænski blaðamaðurinn nefndi Wintris - að hann hefði um stund verið skráður eigandi félagsins fyrir mistök.
Ég þóttist muna annað svo ég fór og skoðaði viðtalið og skrifaði það meira að segja upp.
Eins og sjá má, þá nefnir Sigmundur aldrei neitt um „mistök“ við skráningu á félaginu Wintris. Það er augljós eftiráskýring.
Svona gekk viðtalið fyrir sig, neðst er svo Youtube-hlekkur á það.
Svona var viðtalið:
Hvað um þig sjálfan, forsætisráðherra? Hefur þú eða hefur þú haft einhver tengsl við aflandsfélög?
„Ég? Nei.“
(Fyrsta lygin!!)
„Ja, íslensku fyrirtækin, og ég hef unnið fyrir íslensk fyrirtæki, höfðu tengsl við aflandsfélög, meira að segja … ja, hvað heitir það, verkalýðsfélögin, svo það mundi hafa verið gegnum slíkt fyrirkomulag, en ég hef alltaf gefið allar mínar eignir og fjölskyldu minnar upp til skatts, svo það hefur aldrei verið að nokkrar eignir mínar hafi verið í felum einhvers staðar. Þetta er óvenjuleg spurning fyrir íslenskan stjórnmálamann. Það er næstum eins og að vera ásakaður um eitthvað, en ég get staðfest að ég hef aldrei falið neinar af mínum eignum.“
Afsakaðu ókurteisina, ég vil ekki vera ókurteis, ég vildi bara spyrja þig persónulega hvort þú hefðir aldrei haft nokkur einustu tengsl við aflandsfélög sjálfur.
„Eins og ég segi, mínar eignir hafa alltaf verið uppi á borðinu.“
Forsætisráðherra, hvað geturðu sagt mér um félag sem heitir Wintris?
„Ja, það er fyrirtæki … ef ég man þetta rétt, er það tengt einu þeirra fyrirtækja sem ég var stjórnarformaður í, og sem, og hafði viðskiptareikning sem hafði, eins og ég nefndi, sem hafði verið á skattskýrslu síðan það var stofnað. Nú er mér farið að líða undarlega út af þessum spurningum, því það er eins og þú sért að saka mig um eitthvað, þegar þú ert að spyrja mig um fyrirtæki sem hefur verið á skattskýrslunni frá byrjun.“
Það hlýtur að vera í lagi fyrir mig sem blaðamann að spyrja út í þín persónulegu –
„En þú gefur til kynna að ég hafi ekki greitt skatta af því.“
Nei, ég spyr bara spurninga.
„Ókei.“
En hvað varðar smáatriðin, langar mig að biðja félaga minn að gera það á íslensku, því ég er ekki með smáatriðin á hreinu.
(Jóhannes Kr. kemur og tekur við viðtalinu.)
Af hverju hefurðu ekki sagt frá ---
„Ég skal taka þetta viðtal við þig seinna …“
Af hverju hefurðu ekki sagt frá því að þú sért tengdur aflandsfélaginu Wintris?
„Heyrðu, ég skal veita þér þetta viðtal ef þú biður mig um það – “
Við erum í viðtali núna, Sigmundur, þú getur svarað þessu, þú ert forsætisráðherra þjóðarinnar.
„Algjörlega.“
Þú getur svarað þessum spurningum.
„Vegna þess, eins og ég var að lýsa hérna áðan, þetta kemur fram á skattskýrslunni minni og hefur gert frá upphafi. Það er verið að reyna að gera eitthvað tortryggilegt, sem að ég hef gefið upp alla tíð.“
Þú segir að þú hafir gefið þetta félag upp til skatts.
„Algjörlega.“
Af hverju gafstu þetta ekki upp í hagsmunaskráningu þingmanna eftir að þú varst kjörinn á þing?
„Vegna þess að hagsmunaskráning þingmanna náði til tiltekinna atriða, og öll þau atriði sem hagsmunaskráning þingmanna nær til, voru gefin upp. Og þetta sem þú ert að tala var eitthvað sem var búið til af einhverjum banka, á sínum tíma, en gefið upp frá fyrsta degi, þannig að –“
Átt þú þetta félag eða …?
„Konan mín seldi hlut í fjölskyldufyrirtækinu, það fór í einhverja umsjón í bankanum, og bankinn setti upp eitthvað fyrirkomulag á því, og úr varð þetta fyrirtæki, eða … ég kann ekki einu sinni á þetta allt saman, en allt gefið upp til skatts frá upphafi.“
Sigmundur Davíð stendur upp og býst til brottfarar.
„Og nú …“
Hvaða eignir eru í félaginu?
„Ég meina, þú spyrð …“
Við vitum um það að Wintris var kröfuhafi og er kröfuhafi í föllnu bönkunum.
„Þú ert að spyrja mig um hluti sem ég er ekki einu sinni búinn að kynna mér.“
Þú seldir –
„Þú platar mig í viðtal og þú –“
Þú seldir þinn hlut í félaginu fyrir einn dollara …
„Nei, nei, nei …“
… 2009.
„Nei, þú ert að spyrja mig um einhverja tóma vitleysu. Þú platar mig í viðtal á fölskum forsendum.“
Ég er með undirskriftina þína hérna, Sigmundur. Viltu sjá hana?
„Já, já, ég meina, þetta er bara ekki heiðarlegt.“
Með fullri virðingu, forsætisráðherra, það hlýtur að vera í lagi að spyrja þessara spurninga.
Þetta er –
„Já, einmitt.“
- á gamlársdag 2009.
„Þegar þú biður mig að koma í viðtal, þá verðurðu að gefa mér tækifæri til að kynna mér það sem þú ætlar að spyrja um.“
Þú hlýtur að vita um félagið. Þú seldir konunni þinni helming í félaginu á einn dollar.
„Seldi konunni minni? Ég var ekki einu sinni giftur á þessum tíma. Ég er bara að segja þér, að – “
Anna Sigurlaug er konan þín.
„– þetta hefur allt verið gefið upp til skatts, frá upphafi. Þið eruð að reyna að gera eitthvað tortryggilegt, sem að er ekki tortryggilegt.“
Sigmundur Davíð gengur út.
Athugasemdir