Reykjavíkur-Maraþon er haldið í dag. Af því tilefni er ástæða til að vekja á fyrsta Maraþonhlaupi Íslands, eftir því sem best er vitað.
Það hljóp Magnús Guðbjörnsson 29. ágúst 1926 eða fyrir því sem næst nákvæmlega 90 árum.
Daginn eftir sagði Vísir svo frá:
„Magnús Guðbjörnsson, hinn kunni sigurvegari í Álafoss og Hafnarfjarðarhlaupunum, hljóp í gær um hádegisbilið austan af Kambrabrún og vestur á Íþróttavöll á 3. klst. 15. mín. og 15. sek. - og var ekki þreyttari en það að hann hljóp 100 síðustu stikurnar með spretthlaupshraða.
Er þetta stórvel gert, einkanlega er tillit er tekið til þess, að þetta er í fyrsta sinn, sem Magnús hleypur vegalengdina, og svo hins að þetta var ekki kappleikur, heldur aðeins leikur ... Heimsmetið er 2 klst. 28 mín. 15 sek. Olympskt met 2. klst. 32 mín. 36,8 sek.“
En ekki höfðu allir mikinn skilning á hlaupagleði Magnúsar. Meira að segja faðir hans, Guðbjörn Bjarnarson, var algjörlega andsnúinn því að sonur hans eyddi tíma sínum og orku við hlaup.
Guðbjörn taldi að hlaupin drægju úr vinnukrafti sonarins, en Magnús var lengst af bréfberi í Laugarnesi.
Magnús sagði í viðtali við Alþýðublaðið árið 1939:
„Tók ég þá upp á því að geyma hlaupaklæði mín hjá konu einni í Bergstaðastræti, en hljóp á mótum undir nafninu Magnús G. Björnsson. Vissi faðir minn þannig í heilt ár ekkert um að ég væri að hlaupa. Síðar lagaðist þetta - og hann horfði á hvert hlaup, sem ég tók þátt í.“
Magnús dó árið 1964, aðeins 65 ára gamall.
Athugasemdir