Danski háðfuglinn Storm P. lét einhvern tíma þau fleygu orð falla að það væri erfitt að spá, sérstaklega um framtíðina. Það er erfitt annað en taka undir það. En þegar öllu er á botninn hvolft eru sumir betri en aðrir í að láta sér detta í hug hvað framtíðin ber í skauti sér og bregðast við því – og einn þeirra er Andri Snær Magnason. Einmitt þess vegna er hann rétti maðurinn í embætti forseta Íslands. Framtíðin hefst jú á morgun og sá eða sú sem við veljum í kosningunum á laugardaginn mun móta hana með okkur, leggja sitt af mörkum til að leiða umræðuna svo við nýtum möguleika okkar sem best – bæði sem þjóð og sem íbúar í veröldinni.
Alþjóð veit að Andri Snær er rithöfundur en kannski eru einhverjir búnir að gleyma með hvílíkum fítonskrafti hann geystist fram á ritvöllinn. Hann var 22 ára gamall þegar hann sendi frá sér fyrstu ljóðabókina sína og fjórum árum seinna kom Sagan af bláa hnettinum út, en hún er eitt af þeim íslensku bókmenntaverkum sem víðast hefur ratað um veröldina, þýðingar hafa komið út í fimm heimsálfum og leikrit eftir sögunni verið sett upp víða um heim. Enda er bókin með eindæmum framsýn og greinandi – setur til dæmis misskiptingu auðs í heiminum í samhengi sem börn skilja og geta myndað sér skoðun á. Sannarlega var umræðan um misskiptingu auðs ekki ný af nálinni við lok 20. aldar en síðan bókin kom út hefur hún margfaldast og verið í algleymingi síðan Occupy-hreyfingin kviknaði í Bandaríkjunum árið 2011. Kynslóðin sem hreifst af bláa hnettinum getur tekið þátt í þeirri umræðu.
„Þess vegna treysti ég honum betur en öðrum fyrir framtíð minni, barnanna minna, landsins, hafsins og jarðarinnar allrar.“
Skáldsagan LoveStar kom út árið 2002 og alla jafna er fátt sem eldist verr en vísindaskáldskapur. Þó fékk bókin frönsk vísindaskáldsagnaverðlaun í Frakklandi á dögunum, fjórtán árum eftir að hún var skrifuð. Það er líka sláandi hversu margar af hugmyndunum í LoveStar sem þóttu fjarstæðukenndastar á sínum tíma eru nálægt veruleika okkar núna. Og meira að segja Draumalandið, sem sýnir okkur hversu ófyrirsjáanleg framtíðin er og hvers vegna við eigum ekki að fórna óendurkræfum verðmætum fyrir stundargróða, felur í sér spádóma sem hafa ræst. Dæmi um þetta er ákallið eftir nánari tengslum á milli neytenda og bænda sem Andri setur fram í „Búnaðarbálki“ sínum. Síðan þá hefur „beint frá býli“-bylgjan rutt sér rækilega til rúms hér á landi og lygilega margt af því sem Andri telur upp sem dæmi um hluti sem gætu styrkt íslenskan landbúnað hefur síðan orðið að veruleika – öllum til ánægju og hagsbóta.
Allt þetta getur Andri Snær. Þess vegna treysti ég honum betur en öðrum fyrir framtíð minni, barnanna minna, landsins, hafsins og jarðarinnar allrar. Hann hefur sýnt æ ofan í æ að hann er eitursnjall í þeirri list að velta við steinum og sjá það sem öðrum er hulið, hann stendur upp úr skotgröfum dægurþrassins eins og viti sem bæði sér langt og vítt og lýsir öðrum leið. Hann einblínir aldrei á eina leið til að leysa úrlausnarefni heldur sér marga ólíka möguleika sem henta ólíku fólki við ólíkar aðstæður og hann gefst ekki upp. Hann sér alltaf möguleika. Finnur alltaf valkosti. Tekur engu sem gefnu. Þannig mann getur íslenska þjóðin notað og þess vegna eigum við að setja X við nafn Andra Snæs Magnasonar á laugardaginn og hlakka til framtíðarinnar.
Athugasemdir