Fréttir

Ungur maður lést á AA-fundi

Lögreglan rannsakar svipleg dauðsföll ungmenna á höfuðborgarsvæðinu undanfarnar vikur og mánuði. Þeirra á meðal er andlát ungs manns á AA-fundi í gær. Þau og fleiri eru syrgð á samfélagsmiðlum.

Mikil sorg Ungmenna sem voru bráðkvödd yfir hátíðarnar er nú meðal annars minnst á samfélagsmiðlum af vinum, fjölskyldu og kunningjum. Mynd: Shutterstock

Ungur maður varð bráðkvaddur á AA-fundi í húsi við Tjarnargötu í Reykjavík í gærkvöldi. Samkvæmt upplýsingum frá lögreglu er andlát hans nú rannsakað. Maðurinn, sem var á þrítugsaldri, fannst látinn inni á salerni. Dánarorsökin er enn óljós.

Lögreglan var kölluð á staðinn, sem og prestur sem veitti félögum mannsins sálgæslu fram að miðnætti.

Samkvæmt heimildum Stundarinnar hafði maðurinn breytt um lífsstíl og ákveðið að hætta allri neyslu vímuefna.

Stundin ræddi við fyrrum vímuefnasala sem lýsir því að fjöldi ungs fólks hafi látist að undanförnu.  Hann segir að ástæðan sé oft læknadóp sem flæðir um götur Reykjavíkur í meira magni en hafi sést áður. Maðurinn, sem Stundin ræddi við, stundaði áður viðskipti með læknadóp. Hann keypti ritalín af skólakrökkum og fleirum og seldi sprautufíklum. Hann segir mikla sorg ríkja í „borginni okkar“ um þessar mundir en margir kunningja hans hafi verið bráðkvaddir á undanförnum mánuðum, vikum og dögum.

„Voru ekki á leiðinni að kveðja“

„Þetta er bara rosalegt. Sex einstaklingar á innan við fjórum vikum. Þrír þeirra rétt skriðnir yfir tvítugt en hinir á fertugsaldri. Eftir því sem ég best veit voru þetta allt krakkar sem voru ekki á leiðinni að kveðja. Þeir héldu það ekki og þeirra nánustu óraði ekki fyrir því ... en það gerðist samt,“ segir hann. Sjálfur hefur hann snúið lífi sínu til betri vegar.

Eins og áður segir sérhæfði hann sig í að selja alls kyns læknadóp eins og til dæmis Ritalín. Ritalínið fékk hann frá skólakrökkum, mörgum hverjum sem notuðu ekki fíkniefni, sem höfðu farið til geðlæknis gagngert til þess að fá úthlutað lyf til endursölu á svörtum markaði.

„Í einhver örfá skipti voru þetta krakkar sem voru að detta í prófatörn sem keyptu af mér en aðallega sprautufíklar. Fólk verður svo svakalega háð þessu og langstærsti hlutinn sprautar þessu í sig. Ég hef verið viðriðinn þennan heim í mörg mörg ár en er á beinu brautinni í dag.“

Gífurlegt magn af læknadópi

Á árinu hafa fjölmiðlar greint frá nokkrum ungmennum sem hafa verið bráðkvödd og fram hefur komið að grunur leiki á um að einhver þeirra dauðsfalla tengist neyslu fíkniefna. Læknadópsalinn fyrrverandi segir að notkun þessara hörðu efna sé að aukast. 

„Þetta er að aukast og aldur þeirra sem er að nota þetta harða læknadóp færist alltaf neðar og neðar. Krakkar niður í fjórtán og fimmtán ára orðnir harðir læknadópfíklar. Fíklar í morfín og bensó-lyf. Það er líka gífurlegt framboð af læknadópi þannig að það er nóg til. Það má eiginlega segja að það hafi orðið algjör sprenging í framboði á læknadópi á undanförnum árum. Það eru til yfir hundrað íslenskir söluhópar á Facebook sem selja bara fíkniefni og læknadóp.“

Grafalvarleg staða

Aðspurður segir hann lítið hægt að gera til að fyrirbyggja misnotkun þessara efna. „Það hættir enginn að nota nema hann vilji það sjálfur. Ég vona samt að þeir sem eru þarna úti að nota átti sig á alvarleika málsins þegar vinirnir og vinkonurnar deyja hingað og þangað um borgina. Við þurfum líka að fara að ræða þessa grafalvarlegu stöðu sem komin er í þennan læknadópsmarkað. Hann er að springa.“

Samkvæmt upplýsingum frá Landlæknisembættinu er ekki hægt að fá tölur um þá sem hafa látið lífið á undanförnum dögum eða jafnvel vikum þar sem dánarvottorð eru ekki gefið út fyrr en dánarorsök liggur formlega fyrir. Þær rannsóknir eru í höndum lögreglu og geta tekið mislangan tíma.

Lögreglan á höfuðborgarsvæðinu staðfesti að verið væri að rannsaka fleiri en eitt mál þar sem um er að ræða bráðkvadda unga einstaklinga.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Pistill

NEI, við veitum ekki þessar upplýsingar

Fréttir

Þorsteinn aftur staðinn að rangfærslum – nú um málefni lífeyrisþega

Úttekt

Umsátrið um Katar

Fréttir

Telja að fólk hafi ekki kynnt sér skýrslurnar nógu vel – Benedikt: „Ég kom ekkert nálægt skýrsluvinnunni“

Pistill

Hvern leikur þú?

Úttekt

Fjársvelt samneysla og sögulegar óvinsældir

Mest lesið í vikunni

Fréttir

Slæm tíðindi af Stefáni Karli

Fréttir

Var látin afneita áföllum í áfengismeðferð

Viðtal

„Það var öskrað á mig og mér hótað“

Pistill

Borgar sig ekki að eiga íbúð

Fréttir

Vopnaðir sérsveitarmenn handtóku ölvaðan mann í miðbænum

Fréttir

Föður barnanna vísað úr landi í nótt