„Það var eins og ég hefði stígið út úr lífinu í hálftíma. Þetta gerðist ekki,“ segir Hallgrímur Helgason rithöfundur um nauðgunina sem hann varð fyrir þegar hann var 22 ára. Gerandinn var ókunnugur karlmaður í erlendri borg. 

Hallgrímur segir meðal annars frá þessari lífsreynslu í skáldævisögunni, Sjóveikur í München, sem kom út fyrr í mánuðinum. Bókin fjallar um níu mánuði í lífi Hallgríms þegar hann var nemi í Listaakademíunni í München í Þýskalandi. Þar lýsir hann því þegar hann í sakleysi sínu þáði aukarúm á hótelherbergi ókunnugs fólks þegar hann var á ferðalagi í Flórens á námsárunum. Þegar Hallgrímur hafði lagst til hvílu skreið ókunnugi maðurinn nakinn upp í rúm til hans og braut á honum. 

Skrímsli sem leynist í mörgum karlmönnum

Eftir nauðgunina segist hann hafa farið í djúpa afneitun. Varnarviðbrögð sálarinnar hafi verið að láta eins og ekkert hefði gerst. Hann segist hafa fundið fyrir skömm og reiði. „Ég var bálreiður fyrstu dagana á eftir. Reiður út í þessa borg, Flórens, þar sem þetta gerðist. Reiður út í Karlinn, með stórum staf. Ég hef stundum fengið tækifæri til að fá útrás fyrir þá reiði í bókunum mínum þar sem ég gagnrýni karlmennskuna og þetta skrímsli sem leynist í mörgum karlmönnum. Og þögnina sem hjálpar þeim að vaða áfram í lífinu og hjálpar þeim að gerast frekir. Þögnin hefur verið sérstaklega áberandi hérna á Íslandi þar sem menn hafa komist upp með nánast hvað sem er hvenær sem er. Þannig þetta er inngróið í okkar menningu. Karlar þumbast áfram og litlar nauðganir fara fram, en ekki bara í svefnherberginu heldur líka í efnahagslífinu hér og þar, allan daginn.“

Þá segist hann hafa verið reiður sjálfum sér fyrir að hafa verið svona naívur.