Auglýsingin hverfur eftir stutta stund...
Loka

Fréttir

Bjarni Benediktsson ánægður með kaup Goldman Sachs og vogunarsjóða á Arion banka

Bjarni Benediktsson segir það til marks um styrkleika íslensks efnahagslífs að bandaríski stórbankinn Goldman Sachs og vogunarsjóðir kaupi 30 prósenta hlut í Arion banka. Lilja Dögg Alfreðsdóttir, Katrín Jakobsdóttir og Frosti Sigurjónsson hafa gagnrýnt söluna. Frosti varar við því að arður af háum vaxtagreiðslum almennings renni úr landi.

Bjarni Benediktsson forsætisráðherra Segist ánægður með aukin umsvif erlendra aðila á fjármálamarkaði. Mynd: Pressphotos

Bjarni Benediktsson forsætisráðherra lýsir ánægju með kaup erlendra aðila á nær 30 prósenta hlut í Arion banka. Hann segir ekki enn komið í ljós hverjir fjárfestarnir séu, né hver sé þeirra framtíðarstefna. Katrín Jakobsdóttir, formaður Vinstrihreyfingarinnar - græns framboðs, og Lilja Dögg Alfreðsdóttir, þingmaður Framsóknarflokksins, segja að þörf sé á frekari upplýsingum um fjárfestana. Lilja Dögg hefur óskað eftir fundi með efnahags- og viðskiptanefnd. Frosti Sigurjónsson, fjármálahagfræðingur og fyrrverandi þingmaður Framsóknarflokksins, segir að með sölunni muni arður íslenskra fyrirtækja og vaxtagreiðslur heimilanna renna úr landi, til erlendu fjárfestanna.  

Í gærkvöldi var tilkynnt um sölu á 29,18 prósenta hlut í Arion banka til fjögurra breskra og bandaríkra fjárfesta. Sjóðstýringafyrirtækin Taconic Capital, Attestor Capital, Och-Ziff og fjárfestingabankinn Goldman Sachs keyptu hluti upp á samtals 48,8 milljarða króna. Hlutu þeir einnig kauprétt að 21,9 prósenta hlut í bankanum. Um er að ræða ein umsvifamestu viðskipti erlendra aðila á íslenskum fjármálamarkaði. 

Hluthafi Hluti í Arion banka
Kaupskil ehf. 57,9 %
Bankasýsla ríkisins 13 %
Attestor Capital LLP í gegnum Trinity Investment Designated Activity Company 9,99 %
Taconic Capital Advisors UK LLP í gegnum TCA New Sidecar III s.a.r.l. 9,99 %
Sculptor Investments s.a.r.l., félag tengt Och-Ziff Capital Management Group 6,6 %
Goldman Sachs International í gegnum ELQ Investors II Ltd. 2,6 %

Í samtali við Morgunblaðið í gærkvöldi sagði Bjarni viðskiptin ánægjuleg og að með þeim væri ákveðnum tímamótum náð í uppgjöri við efnahagshrunið árið 2008. „Þetta sýn­ir ótví­rætt traust á aðstæðum hér­lend­is og það eru sann­ar­lega góðar frétt­ir ef hingað vilja koma öfl­ug­ir er­lend­ir aðilar sem eru til­bún­ir að ger­ast lang­tíma­fjár­fest­ar í ís­lensk­um fjár­mála­fyr­ir­tækj­um. Auðvitað á eft­ir að koma í ljós hvað þess­ir til­teknu aðilar eru að hugsa og hversu lengi þeir hafa hugsað sér að fjár­festa hér en viðskipt­in sem slík eru mikið styrk­leika­merki fyr­ir ís­lenskt efna­hags­líf,“ seg­ir Bjarni Benediktsson meðal annars í samtali við Morgunblaðið.

Katrín: Þurfum að vera á varðbergi

Katrín Jakobsdóttir sagði hins vegar í samtali við Morgunblaðið að ástæða sé til þess að vera á varðbergi, salan veki upp ýmsar spurningar, til að mynda hvort fjárfestarnir ætli sér að byggja upp langtímastarfsemi hér á landi. Hún bendir á að tveir kaupenda hafi keypt 9,99 prósenta hlut sem sé rétt undir 10 prósenta viðmiði Fjármálaeftirlitsins um virkan eignarhlut. Með því að kaupa hlut sem er undir 10 prósentum komist kaupendur hjá því að verða skoðaðir af Fjármálaeftirlitinu.

„Mér finnst eðli­legt að ís­lensk­ur al­menn­ing­ur viti hverj­ir séu raun­veru­leg­ir kaupend­ur.“

„Mér finnst eðli­legt að ís­lensk­ur al­menn­ing­ur viti hverj­ir séu raun­veru­leg­ir kaupend­ur. Ekki síst í ljósi for­sög­unn­ar og hvernig mál­in þróuðust fyr­ir banka­hrunið. Ég tel ein­fald­lega að við þurf­um að vera á varðbergi í þess­um mál­um. Þó það geti verið já­kvætt að ein­hverju leyti að fá inn er­lenda aðila í ein­hverja starf­semi þá skipt­ir máli að við ger­um sömu kröf­ur til þeirra og annarra meðal ann­ars varðandi eign­ar­hald. Þannig að ég geld var­hug við þessu,“ sagði Katrín meðal annars.

Lilja Dögg: Þörf á gagnsæi

Lilja Dögg Alfreðsdóttir tók í svipaðan streng í Morgunútvarpi Rásar 2 í morgun þegar hún sagði mikilvægt að gagnsæi væri til staðar. Hún hefur óskað eftir fundi efnahags- og viðskiptanefndar, til að fá frekari upplýsingar um eignarhald bankanna, sem hún sagði nauðsynlegar til að byggja upp traust og trúverðugleika á fjármálamarkaði. Stjórnvöld þyrftu að hafa framtíðarsýn á fjármálamarkaði og sagðist hún hafa áhyggjur af því að ríkisstjórnin væri ekki nægilega vel undirbúin fyrir næstu skref. Hún sagðist hafa óskað eftir fundinum til þess „að fá upplýsingar og skapa traust og tiltrú og þverpólitíska sátt um hvernig við skoðum framtíðarskipan á íslenskum fjármálamarkaði“.  

Lilja Dögg sagði það sérstaklega mikilvægt í ljósi sögunnar að fá upplýsingar um það hverjir standa á bakvið kaupin: „Við þurfum upplýsingar um hvað þeir ætla sér með bankann og hver er framtíðaeigendarsýn eigendana og markmið með fjárfestingunni.“ 

Frosti :  Vaxtagreiðslur heimilanna renna úr landi

Frosti Sigurjónsson gagnrýnir forsætisráðherra á Facebook síðu sinni. Þar sagðist hann skilja að því væri fagnað ef erlendir aðilar stofnuðu hér banka til að auka samkeppni, en svo sé ekki. „Tímamótin miklu felast því miður einungis í því að nú fer arðurinn af bankanum og þar með vaxtagreiðslum heimilanna að renna úr landi.“

„Nú fer arðurinn af bankanum og þar með vaxtagreiðslum heimilanna að renna úr landi.“

Þá sagði hann: „Forsætisráðherra Íslands segir það „sannarlega góðar fréttir“ að útlendingar fjárfesti í íslenskum banka og þar með einu stærsta og arðbærasta fyrirtæki landsins. Arion á hátt í þriðjung allra lána til íslenskra heimila og atvinnulífs. Þessi útlán eru verulega arðbær og hér eftir mun arðurinn af þeim að miklu leiti renna úr landi. Forsætisráðherrann virðist samt ekki mjög upptekinn af slíkum smáatriðum, talar þess í stað um „tímamót“ og mikið „styrkleikamerki“. 

Ætla mætti af fagnaðarlátunum að erlendir aðilar væru að stofna hér nýjan banka til að efla samkeppni en svo er ekki. Þeir eru einfaldlega að kaupa hlutabréf á lágu verði og ætla sér að hámarka arðinn af þeim. Því meiri sem fákeppnin og gróðinn í bankarekstri þeim mun meiri arður,“ skrifaði Frosti á Facebook-síðu sína.

Athugasemdir

Allar athugasemdir eru ábyrgð á þeirra sem þær skrifa. Stundin áskilur sér rétt til að fjarlægja ærumeiðandi og óviðeigandi athugasemdir.

Mest lesið í dag

Viðtal

Foreldrunum ráðlagt að láta hann frá sér

Viðtal

Ekkert feimin við að berjast fyrir sínu

Fréttir

Kennarar lifa ekki dæmigerðu lífi af launum sínum

Pistill

Allar hrakspár reyndust réttar, engin von rættist

Pistill

Elsku þolandi

Fréttir

Brynjar óttast að neikvæð umræða skaði bankakerfið

Mest lesið í vikunni

Viðtal

„Það er ekki hægt að dæma látinn mann“

Viðtal

Foreldrunum ráðlagt að láta hann frá sér

Viðtal

Ekkert feimin við að berjast fyrir sínu

Fréttir

Nichole gagnrýnir RÚV fyrir að gefa Mikael „mikið svigrúm“ og segir að dregin sé upp dökk mynd af sér

Viðtal

Erfiðara að berjast við kerfið en að eiga barn með Downs

Fréttir

Stjórnarliðar gagnrýna Mikael Torfason vegna ummæla hans um fátækt á Íslandi