Þau Sigurbjörg Hjörleifsdóttir og Ólafur Ingi Skúlason eru rík af vel heppnuðum afkvæmum. Þau eiga tíu ára dóttur, Andreu, soninn Viktor Skúla, sem er fimm að verða sex og Freyju, sem er nýorðin fjögurra ára. Hvað þroska varðar eru yngri systkinin tvö á svipuðum slóðum stödd. Viktor Skúli er nefnilega með Downs-heilkennið og þroskast því ekki á sama hraða og önnur börn.
Sigurbjörg og Viktor hitta blaðamann Stundarinnar í húsakynnum Styrktarfélags lamaðra og fatlaðra á Háaleitisbraut, þangað sem þau eru mætt í hans vikulegu iðjuþjálfun. Viktor er nú ekkert endilega á því að fara með þjálfaranum strax og vill heldur hlusta á mömmu sína spjalla og leika sér að stórum tuskufíl á biðstofunni. Það tekur þó þjálfarann ekki langan tíma að lokka hann inn í salinn, enda greinilega orkumikill strákur sem finnst gaman að leika sér.
Athugasemdir