Í dag tilkynnti orkubloggarinn Ketill Sigurjónsson að hann hyggðist hætta að blogga um orkumál á Íslandi.

Hann skrifar:

Það er engu að síður svo að ég hef orðið sífellt meira var við það að bæði í orkugeiranum hér, fjármálageiranum og víðar þrífst víða mikil undirgefni gagnvart Norðuráli og öðrum stóriðjufyrirtækjum sem hér starfa. Enda eru þessi útlendu stóriðjufyrirtæki með mikla veltu og kaupa hér margvíslega þjónustu. Og það eitt og sér skapar þeim völd. Hvað viðvíkur mér, þá er þarna um að ræða þvílíka yfirburðarstöðu að einstaklingur getur ekki til lengdar verið í því hlutverki að upplýsa um hið sanna um viðskiptaumhverfi og starfsaðferðir þessara fyrirtækja.

Í tilefni af ákvörðun hans, sem Kjarninn fjallar nánar um hér ætla ég að rifja upp nokkur gullkorn af orkublogginu, sem var að leggja upp laupana. Það verður að segjast eins og er að það er frekar skítt að þegar álverin geti ekki mútað fólki með verkefnum þá reyni það að skemma fyrir því með því að hóta samstarfsfólki

Frá mikilvægi réttra og hlutlausra upplýsinga, þriðja mars 2016.

Hið rétta í málinu er að flest bendir til þess að meðalverð á raforku til álvera hér er og hefur um langt skeið almennt verið töluvert undir heimsmeðaltali. Og það var rangt eða a.m.k. mjög villandi hjá Hagfræðistofnun að segja að orkuverðið hér „virðist því vera á sama bili og annars staðar að jafnaði“. Þetta var auðvitað miður, því réttar og hlutlausar upplýsingar eru ákaflega mikilvægar. Við getum svo spurt okkur af hverju það var svo lengi almennur skilningur á Íslandi, að meðalverð á raforkunni hér til álvera væri alls ekki lágt?

Frá: þó fyrr hefði verið, 29 apríl 2008.

En þegar kom að hugmyndum um fulla aðild Íslands að EB var viðkvæði andstæðinganna oftast að það mætti ekki, því þá myndum við ekki lengur ráða yfir fiskimiðunum. Þetta var hræðsluáróður - um þetta var í raun engin vissa. Og niðurstaðan hefði einfaldlega eingöngu fengist með samningaviðræðum. En það mátti ekki skoða málið.

Frá: Hr. Álver og bert fólk, um álverið í Helguvík, sjötta júní 2008.

Aftur á móti hef ég ekki neinstaðar séð staðfestingu þess efnis að álverið hafi þann losunarkvóta, sem það hlýtur að þurfa. Hafa stjórnvöld yfir slíkum kvóta að ráða? Og ef svo er; ætla þau þá að gefa þessu ágæta fyriræki kvótann? Nei - þau hljóta að selja þeim kvótann. I presume. Eins og þau ætla að láta bifreiðanotendur greiða fyrir sína kolefnislosun. 

Um uppgang vindorku á Norðurlöndunum frá því í seinustu viku.

Uppbygging í vindorku hefur verið nokkuð hröð í Noregi síðustu árin. Og nú er svo komið að Norðmenn framleiða um 2,5 TWst af raforku með þessum hætti árlega. Það er ámóta eins og helmingurinn af allri raforkuframleiðslu Kárahnjúkavirkjunar (sem er langstærsta virkjun á Íslandi). Til samanburðar er einnig áhugavert að þetta er miklu meiri raforka en HS Orka framleiðir. Og jafngildir um 3/4 af allri raforkuframleiðslu ON/OR. Norsk vindorka er því sannarlega umtalsverð, þó svo hún sé einungis lítið hlutfall af allri raforkuframleiðslu í Noregi.

Og smá frá þeim tækifærum sem blasa við norsku Landsvirkjun þegar sú stofnun losnar úr núgildandi orkusamningum við stóriðju. Frábært tækifæri Statkraft frá Febrúar síðastliðnum.

Þessir samningar hafa hentað Statkraft prýðilega, þ.e. tryggt fyrirtækinu góðar stöðugar tekjur. En á móti kemur að þessir stóriðjusamningar halda aftur af arðsemi Statkraft. Mögulega verður endursamið um eitthvað af þessari orku við stóriðju - á hærra verði en verið hefur. En svo er líka mögulegt að talsvert af þessari orku verði fremur seld á almenna raforkumarkaðnum. Þar sem verðið er almennt töluvert hærra en stóriðjan greiðir.

 Að lokum þess að hafa rifjað nokkra af helstu blogg-slögurum Orkubloggsins vil ég óska öllum álversforstjórum landsins til hamingju. Þetta er væntanlega sú niðurstaða sem þið vilduð þegar þið byrjuðuð að ógna fólki úr viðskiptalífinu og ráða almannatengla til að rægja eina af þeim fáu skynsemisröddum sem við höfum í orkumálum á Íslandi.

P.S.
Að því sögðu þá þurfa menn ekki að vera sammála um allt. Er í lagi að bjóða sumum lágt verð á orku innanlands? 

Væri í lagi að stefna að rafbílavæðingu með innlendri orku á næstu áratugum? Forgangsraða í þágu hátækni-iðnaðar í anda CCP? Selja orkuna hræódýrt til bænda í skiptum fyrir aukna grænmetisframleiðslu?

Ódýr orka er ekki endilega slæm, það er ekki endilega sjálfgefið að við seljum hana alla til hæstbjóðanda í gegnum sæstreng.

En það sem er mikilvægt er að fólk sem tekur þátt í umræðunni sé ekki ógnað. Þöggun er versta samfélagsmeinið, því hún lokar á að hægt sé að laga öll önnur mein.